شارپرێس:
دەستەی پەخشی ئیسرائیل ڕۆژی یەکشەممە ڕایگەیاند کە ئێران خۆی بۆ ئۆپەراسیۆنێکی دیکەی ئیسرائیل بۆ سەر خاکەکەی ئامادەدەکات.
دەستەی پەخش ڕایگەیاندووە کە "ئێران لە ئێستادا کار لەسەر بنیاتنانەوەی تواناکانی دەکات کە لە کاتی شەڕی ١٢ ڕۆژەی حوزەیرانی ڕابردوودا زیانێکی زۆریان بەرکەوتووە" جەختیشی لەوە کردەوە کە "تاران بە خێراییەکی پێوانەیی خۆی پڕچەک دەکاتەوە، لە ترسی لێدانی ڕاستەوخۆی ئیسرائیل لە ناو خاکی ئێراندا".
دەستەی پەخشی ئیسرائیل ڕونی کردەوە "دەرکەوتە هەرە دیارەکانی ئەم خۆپڕچەککردنە بریتین لە چڕکردنەوەی ناردنی چەکی پێشکەوتوو بۆ حیزبوڵا لە لوبنان، خێراکردنی پڕچەککردنی حوسییەکان لە یەمەن بە مووشەکی بالیستی و فڕۆکەی بێفڕۆکەوان، هەروەها زیادکردنی ئۆپەراسیۆنەکانی قاچاخچێتی چەک بۆ کەرتی ڕۆژئاوا بۆ ئەنجامدانی هێرش دژی ئیسرائیلییەکان".
ئاماژەی بەوەشکردووە، "دەزگا هەواڵگرییەکانی ئیسرائیل چاودێری چالاکییە نائاساییەکانی کەشتیوانی و قاچاخی پەیوەست بە ئێران دەکەن، تاران هەروەها هەوڵەکانی چڕتر دەکاتەوە بۆ دروستکردنەوەی کاریگەری تەواوی خۆی لە یەمەن دوای هێرشەکانی پێشووی ئیسرائیل بۆ سەر ژێرخانی حوسییەکان".
هۆشداریشی دا "ئێران باش ئاگادارە لەوەی ئیسرائیل ناچار بێت پێش کۆتایی ساڵی ٢٠٢٥ ڕێوشوێنی سەربازی لە دژی حیزبوڵا بگرێتەبەر ئەگەر بە تەواوی چەک داماڵین ڕوونەدات".
ئ.ح
