شارپرێس:
بەهۆی بڵاوبونەوەی پەتای وەرزی لەناو منداڵاندا، بڕیاردراوە بۆ ماوەیەک خوێندن  لەرۆژئاوای کوردستان رابگیرێت و قوتانخانەکان پاکژبکرێنەوە.

بەرپرسێکی بەڕێوەبەرایەتی خۆسەر بە ماڵپەڕی "نۆرس پرێس"ی راگەیاندوە،" کۆبونەوەیەکی هاوبەش لەنێوان هەردوو دەستەی تەندروستی و پەروەردە بۆ چۆنێتی ڕوبەڕوبونەوەی پەتا وەرزییەکان بەڕێوەدەچێت ".

ئەوەشیخستەڕوو، بەمەبەستی رێگریکردن لە بڵاوبونەوەی ئەو پەتایە لەناو خوێندکاران و بەتایبەت منداڵان، پرۆسەی خوێندن لەناوچەکانی ژێر دەسەڵاتی بەڕێوەبەرایەتی خۆسەر ڕادەگیرێت.

ئەو بەرپرسەی رۆژئاوای کوردستان وتیشی، لەماوەی راگرتنی پرۆسەی خوێندندا سەرجەم قوتابخانەکان پاکژدەکرێن.

بەپێی ئامارەکان، رۆژانە نزیکەی هەزار حاڵەتی توشبون بە پەتای (H3N2) لە نەخۆشخانەی کۆبانێ تۆماردەکرێت.