شارپرێس:

هاوسەرۆکی هەردوو گەڕەکی ئەشرەفییە و شێخ مەقسود لەحەلەب زانیاری نوێ لەبارەی گرژی و ئاڵۆزییەکانی نێوان شەڕڤانانی کورد و چەکدارانی شەرع لەو دوو گەڕەکە ئاشکرادەکات و دەڵێت، هێزەکانی ئاسایشی ناوخۆ بە بەرخودانێکی مێژویی وەڵامیان دەدەنەوە.

نوری شێخۆ، هاوسەرۆکی ئەنجومەنی هەردوو گەڕەکی ئەشرەفییە و شێخ مەقسود لە حەلەب، کەمێک لەمەوبەر بە "روداو"ی راگەیاندوە،" لە نزیک کاتژمێر 02:30ـی نیوەڕۆوە شەڕێکی سەخت لە هەردوو گەڕەکەکە دەستیپێکردوە و سوپای سوریا بە چەکی قورس هێرش دەکەن".

ئەوەشیخستەڕوو، "هەموو چەکێکی قوورس لە شەڕەکەدا بەکاردەهێندرێت، گەمارۆی گەڕەکەکان دراوە بە تانک و دەیان هەزار کەسیش لەنێو گەڕەکەکاندا دەژین".

هاوسەرۆکی ئەنجومەنی هەردوو گەڕەکی ئەشرەفییە و شێخ مەقسود باسی لەوەشکرد،" تەواوی هێرشەکان تێکشکێندراون، هێزەکانی دیمەشق نەیانتوانیوە یەک هەنگاو پێشڕەوی بکەن، هێزەکانی ئاسایش لە تەواوی خاڵەکانی خۆیان جێگیرکراون و رێگە بە داگیرکردنی گەڕەکەکان نادەن".