شارپرێس:

لەوکاتەی تەپوتۆزی جەنگی داعش لەسەر جەستەی پێشمەرگەو شەڕڤانان نەنیشتوەتەوە، لەهۆڵە گەرم‌و گوڕەکانی ڕیازدا، مەرەکەبی بەیاننامەکان ناوی ئەوانی فەرامۆشکرد، هۆشیار زێباری، بەتوڕەییەوە پەردە لەسەر بێوەفاییەکی نێودەوڵەتی لادەدات کە تێیدا خوێنی کورد لەسەنگەرەکاندا ڕژا، بەڵام لەنەخشەی سیاسیی سوریای نوێ‌و هاوپەیمانییەکاندا جێگەی نەکراوەتەوە.

لەکاتێکدا جیهان ئاهەنگی سەرکەوتن بەسەر مەترسیدارترین ڕێکخراوی تیرۆریستی، (داعش) دەگێڕێت، کۆبونەوەی ئەمدواییەی هاوپەیمانی نێودەوڵەتی لەڕیاز كه‌ له‌9ى ئه‌م مانگه‌ به‌ڕێوه‌چوو، بوە جێی مشتومڕێکی زۆر، هۆکارەکەش نەبونی هیچ ئاماژەیەک بوو بۆ ئەو هێزانەی کە لەسەر زەوی‌و بەکردەیی ئەفسانەی داعشیان تێکشکاند؛ هێزی پێشمەرگەی کوردستان‌و هێزەکانی سوریای دیموکرات (هەسەدە).

ڕەخنەکەی هۆشیار زێباری.. دەنگی ناڕەزایەتییەکی قووڵ
هۆشیار زێباریی وەک سیاسەتمەدارێکی ناسراوى كورد پەنجەی خستەسەر برینێکی کۆن، ئەو وتى، "بەیاننامەی کۆتایی کۆبونەوەکە، نەک هەر بێوەفایی بوو بەرامبەر بەهەزاران شەهیدی کورد، بەڵکو نیشانەی تێنەگەیشتنێکی سیاسییە لەواقیعی مەیدانیی، چۆن دەکرێت باس لەتێکشکانی داعش بکرێت بەبێ ناوهێنانی ئەو هێزانەی کە سنگیان کردە قەڵغان؟".

پارادۆکسی بەشداریی عێراق
خاڵێکی سەرنجڕاکێش له‌م نێوه‌نده‌دا ئەوەیە کە عێراق لەسەر ئاستی بریکاری وەزیری دەرەوە بەشداربوە كه‌ نوێنه‌رایه‌تیه‌كه‌ (شۆرش خالید سەعید) كردویه‌تى، وه‌كو سه‌رچاوه‌كان ده‌ڵێت، "جێی سەرسوڕمانە کە نوێنەرایەتی عێراق نەیتوانیوە یان نەیویستوە فشار دروستبکات بۆ جێگیرکردنی ناوی پێشمەرگە یان هه‌سه‌ده‌ لەبەیاننامەکەدا، لەکاتێکدا پێشمەرگە بەشێکی دەستورییە لەسیستەمی بەرگریی عێراق".

ململانێی "سوریای نوێ"و پەراوێزخستنی هەسەدە
زێباریی ئاماژەی بەبەشداریی "سوریای نوێ" کرد لەکۆبونەوەکەدا، ئەمە نیشانەی گۆڕانکارییەکی سیاسیی گەورەیە لەناوچەکەدا کە تێیدا بەرژەوەندییە ئیقلیمییەکان جارێکی دیكه‌ دەیانەوێت دەستکەوتە مەیدانییەکانی کورد لەڕۆژئاوای کوردستان (سوریا) نادیدە بگرن‌و لەچوارچێوەی ڕێککەوتنە نوێیەکاندا ونی بکەن.

چاودێرانى سیاسیى كوردو دۆسته‌كانى گه‌لى كورد به‌نیگه‌رانیه‌وه‌ باسیان له‌بەیاننامەی كۆتایی کۆبونەوەی ئەمدواییەی هاوپەیمانی نێودەوڵەتی لەڕیاز كردوه‌و جه‌ختده‌كه‌نه‌وه‌، "مێژوو بەبەیاننامەی دیپلۆماسی نانوسرێتەوە، بەڵکو بەو خوێنە دەنوسرێتەوە کە لەچیای شنگال، کۆبانی‌و دەشتی نەینەوا ڕژا".

هه‌روه‌ك په‌یامه‌كه‌ى زێیارى جه‌ختده‌كاته‌وه‌ له‌سه‌ر، "فەرامۆشکردنی ڕۆڵی کورد لەکۆڕە نێودەوڵەتییەکاندا، تەنها بێوەفایی نییە، بەڵکو مەترسییەکی گەورەیە بۆ دوبارە سەرهەڵدانەوەی توندڕەویی، چونکە پشتگوێخستنی هاوبەشە ڕاستەقینەکان، یارمەتیدەر دەبێت بۆ دروستبونی بۆشایی ئەمنیی‌و سیاسیی، له‌به‌رئه‌وه‌ پێویستە کۆمەڵگەی نێودەوڵەتی بزانێت کە سەقامگیریی ناوچەکە بەبێ داننان بەماف‌و قوربانییەکانی کورد، تەنها ئاشتییەکی کاتیی دەبێت لەسەر کاغەز".