شارپرێس:

ناوچەکە بەدەست گۆڕانکاریی خێراوە دەناڵێنێت، پەرلەمانی ئەوروپایش بەبڕیارێکی مێژویی (بەزۆرینەی 363 دەنگ) نەخشەی سیاسیی باکوری سوریای دوبارە کێشایەوە، ئەو بڕیارە تەنها دەقێکی یاسایی نییە، بەڵکو تۆقاندنی سیاسییە بۆ خەونە فراوانخوازییەکانی ئەردۆغان‌و دانپێدانانێکی فەرمییە بەوەی کە هیچ سوریایەک بەبێ کورد بونی نابێت.

به‌گوێره‌ى ڕاپۆرتێكى شیکاریی ڕۆژنامەی یه‌دیعۆت ئه‌حرانۆت، بڕیارە نوێیەکەی پەرلەمانی ئەوروپا گۆڕانکارییەکی ستراتیژییە لەبەرژەوەندی کوردو دژی ویستەکانی تورکیایه‌ لەباکوری سوریا (ڕۆژئاواى كوردستان).

ڕۆژنامه‌كه‌ ئاماژه‌ى به‌دانپێدانانی سیاسیی كردوه‌و ده‌ڵێت، "پەرلەمانی ئەوروپا بەڕاشکاوی وتویه‌تى، داننان بەمافە مەدەنی‌و پەروەردەییەکانی کوردو بەشداریکردنی سیاسییان، مەرجی سەرەکی‌و بێ جێگرەوەی سەقامگیریی سوریایە، هه‌روه‌ك بڕیارەکە پەیامێکی توندە بۆ ئەنكەرە کە نابێت لەڕێگەی ئۆپەراسیۆنی سەربازیی یان پاڵپشتی گروپە چەکدارەکانەوە ئاگربەست تێکبدات، ئەمەش وەک داخستنی دەرگا لەبەردەم خەونەکان یان ناوچەداگیرکارییەکانی ئەردۆغان لەقەڵەمدراوە.

ڕۆژنامه‌كه‌ ئاماژه‌ى به‌وه‌شكردوه‌، په‌یامه‌كه‌ى په‌رله‌مانى ئه‌وروپا شەرعیەتى بەهەسەدە داوه‌، به‌جۆرێك، "ئەوروپا پێشوازیی لەڕێککەوتنی نێوان هێزەکانی سوریای دیموکرات (هەسەدە)و لایەنەکان کردوە، ئەمەش وەک دانپێدانانێکی ناڕاستەوخۆ بەقەوارەی سیاسیی‌و سەربازیی کورد لەناوچەکەدا دەبینرێت".

هه‌روه‌ك وا شرۆڤه‌ى بۆكراوه‌ په‌یامه‌كه‌ى په‌رله‌مانى ئه‌وروپا ستایشی قارەمانێتی کورد ده‌كات، بۆ ئه‌مه‌ش هاتوه‌، "پەرلەمان جەختی لەڕۆڵی مێژویی‌و یەکلاکەرەوەی هێزە کوردییەکان (بەتایبەت ژنانی شەڕکەر) کردوەتەوە لەتێکشکاندنی داعش‌و هۆشداریداوە کە هەر لاوازکردنێکی کورد، دەبێتە هۆی سەرهەڵدانەوەی تیرۆر".

به‌شێكى دیكه‌ى په‌یامه‌كه‌ په‌رله‌مانى ئه‌وروپا ئاماژه‌كردنه‌ به‌بەڵگەنامەکردنی پێشێلکارییەکان، له‌و ڕوه‌شه‌وه‌ یه‌دیعۆت ئه‌حرانۆت نوسیویه‌تى، "بڕیارەکە پشتی بەڕاپۆرتی نێودەوڵەتی بەستوە کە ئاماژە بەئەشکەنجەدان، بێسەروشوێنکردن‌و تەنانەت بێڕێزیکردن بەتەرمی کوردان دەکات لەلایەن گروپە توندڕەوەکانی سەر بەتورکیاوەو ئەمانەی وەک تاوانی جەنگ ناساندوە".

بۆ یەکەمجار، ئەوروپا بەم ڕاشکاوییە جەخت لەوەدەکاتەوە، "مافی خوێندن بەزمانی کوردی‌و مافە مەدەنییەکانیان تەنها داواکارییەکی ناوخۆیی نین، بەڵکو مەرجی یەکەمی یەکێتیی ئەوروپان بۆ هەر جۆرە پەیوەندییەک لەگەڵ دیمەشق یان سەقامگیریی لەناوچەکەدا، ئەمە گواستنەوەی دۆزی کوردە لەبارودۆخێکی مرۆییەوە بۆ پێویستییەکی دەستوریی.

پەرلەمانی ئەوروپا بەڕێزگرتن لەڕۆڵی شەڕڤانانی کورد (بەتایبەت ژنان) لەتێکشکاندنی داعش، پەیامێکی ڕونی ناردوه‌و جه‌ختده‌كاته‌وه‌، "کورد قەڵغانی جیهانە لەدژی تیرۆر، ڕاشکاوانەش ده‌ڵێین، هەر هێرشێکی تورکیا یان گروپە چەکدارەکان بۆسەر ناوچە کوردییەکان، بەواتای پێدانی هەناسە دێت بەداعش، ئەمەش هێڵێکی سوری توندی ئەوروپایە".

ڕاپۆرتەکە بەزمانێکی زۆر توند باس لەڕاپۆرتە متمانەپێکراوەکان دەکات سەبارەت بەبێڕێزیکردن بەتەرمی کوردان‌و تێکدانی گۆڕستانەکانیان، ئەوروپا ئەوکارانەی وەک تاوانی جەنگ ناساندوە، ئەمەش چەکێکی یاسایی بەهێز دەداتە دەست کورد تا لەناوەندە نێودەوڵەتییەکاندا داوای مافی خۆی بکەن‌و فشاربخاته‌سه‌ر ئەو هێزانەی دەیانەوێت دیمۆگرافیای ناوچەکە بگۆڕن.

به‌گوێره‌ى شیكارییه‌كه‌ى ڕۆژنامه‌ ئیسرائیلیه‌كه‌، ئەم بڕیارە "داخستنی دەرگایە" لەهەوڵەکانی تورکیا بۆ دابڕینی کورد، دانپێدانانی ئەوروپا بەڕێککەوتنە سیاسییەکانی کورد، واتای ئەوەیە کە کورد ئێستا وەک کارەکتەری سەرەکی لەمێزی گفتوگۆ نێودەوڵەتییەکاندا سەیردەکرێت، نەک پاشکۆ.

ئەمڕۆ کورد لەباکوری سوریا (ڕۆژئاواى كوردستان) تەنها خاوەن خاک نییە، بەڵکو خاوەن پشتیوانییەکی یاسایی‌و سیاسیی نێودەوڵەتییە کە دەڵێت: "سەقامگیریی ڕۆژهەڵاتی ناوەڕاست بەگەروی مافەکانی کورددا تێدەپەڕێت‌و هەر دەستدرێژییەکیش بۆسەر کورد، ئێستا وەک دەستدرێژیی بۆ سەر ئاسایشی نێودەوڵەتی ئەژمار دەکرێت".