شارپرێس ـ شیكاریى:
لەپەیامێکی زۆر توندو ڕاشكاوانهدا لەمێژوی ململانێکانی نێوان هەردوو وڵاتدا، پیت هیگسێت وەزیری بەرگریی ئەمریکا، گۆڕینی ستراتیژیی جەنگی وڵاتەکەی بەرامبەر بەئێران ڕاگەیاند، هیگسێت جەختیکردەوە، ویلایەتە یەکگرتوەکان لەژێر ناوی ئۆپەراسیۆنی (گهردهلولى توڕهیى)دا، پێی ناوەتە قۆناغێکی یەکلاکەرەوە کە ئامانج لێی نەک تەنها لاوازکردن، بەڵکو هەڵوەشاندنەوەی تەواوی تواناکانی تارانە.
قۆناغى دوهم.. لەبەرگرییەوە بۆ تەفروتوناكردن
دوای ئەوەی لەقۆناغی یەکەمدا توانرا 90٪ی هەڕەشە موشەکییەکانی ئێران پوچەڵبکرێنەوە، ئێستا سوپای ئەمریکاو هاوپەیمانەکانی چونەتە ناو قۆناغی دوەمهوه، ئەم قۆناغە تەنها بۆردومانی سەکۆکان نییە، بەڵکو پرۆسەی سڕینەوەی ژێرخانی سەربازیی، کارگەکانی دروستکردنی موشەکو درۆنەکانە لەقووڵایی خاکی ئێراندا، بەجۆرێک کە تاران بۆ چەندین دەیەی داهاتوو نەتوانێت هەڕەشە لەئاسایشی ناوچەکە بکاتەوە.
ئاسمانی ئێران.. گۆڕەپانی نمایشە سەربازییەکانی ئەمریکا
وەزیری بەرگریی ئهمریكا ئاشکرایکردوه، چیتر ئاسمانی ئێران هیچ پارێزبەندییەکی تێدانەماوەو بەتەواوی لەژێر کۆنترۆڵی فڕۆکە جەنگییەکانی ئەمریکاو ئیسرائیلدایە.
چاودێران پێیانوایه، گۆڕانکارییە گەورەکە لەوەدایە کە واشنتۆن لەبەکارهێنانی موشەکی دورهاوێژەوە (کروز) گۆڕاوە بۆ بەکارهێنانی بۆمبە زیرەکەکان کە ڕاستەوخۆ لەناو جەرگەی ئاسمانەوە ئامانجە ستراتیژییەکان دەپێکن، ئەمەش نیشانەی باڵادەستیی ڕەهای تەکنیکیو سەربازییە.
پەیامە سیاسییەکان.. کۆتایی سەردەمی میراتگریی
توندترین بەشی پەیامەکەی هیگسێت پەیوەندیی بەناوخۆی ئێرانو داهاتوی دەسەڵاتەوە هەبوو، واشنتۆن بەڕونی ڕایگەیاند، ڕێگە بەهیچ پرۆسەیەکی میراتگریى (تهوریس)و گواستنەوەی دەسەڵات بۆ ناو بنەماڵەی خامنەیی (وەک موجتەبا خامنەیی) نادات، ئیدارەی ترەمپ دەیەوێت بەشێوەیەکی کردەیی دەستوەردان لەدیاریکردنی جۆری ئەو دەسەڵاتەدا بکات کە لەداهاتودا حوکمی ئێران دەکات.
جەنگێکی جیاواز؛ نەک وەک عێراقو ئەفغانستان
وەزیری بەرگریی ئهمریكا ئەو ترسەی ڕەواندەوە کە ئەمریکا بیەوێت جارێکی دیكه بکەوێتە ناو جەنگی بێکۆتایی یان پرۆسەی بونیادنانەوەی دەوڵەت، وهكو وتى، "ئەمجارە ستراتیژەکە نەشتەرگەرییەکی سەربازیی قورسو خێرایە؛ لێدانێکی کوشندە بۆ بەدیهێنانی ئەنجامی سیاسیی بەرجەستە بەبێئەوەی هێزی زەمینی ڕەوانە بکرێت یان بەرپرسیارێتی ئیداریی وڵاتەکە بگرێتە ئەستۆ".
بێدەنگبون بەرامبەر قەیرانی مرۆیی
لەهەنگاوێکی ساردو یەکلاکەرەوەدا، واشنتۆن دەرگاکانی بەڕوی هەر کۆچبەرو پەنابەرێکی ئێرانی داخستو بەرپرسیارێتی هەر کارەساتێکی مرۆیی خستە ئەستۆی وڵاتانی ناوچەکە، ئەمە پەیامێکی ناڕاستەوخۆیە کە ئەمریکا تەنها بۆ کۆتاییهێنان بەهەڕەشەی سەربازیی هاتوەو تێچوی کۆمەڵایەتیو مرۆیی جەنگەکە بۆ لایەنە ناوخۆییو هەرێمییەکان جێدەهێڵێت.
کۆتایی پەیامەکەى وهزیرى بهرگریى ئهمریكا بریتیى بوو لهوهى، "کاتژمێری کۆتایی جەنگ لەدەستی واشنتۆندایەو تاران تەنها یەک بژاردەی لەپێشە، یان تەسلیمبون بەمەرجەکانی ئەمریکا، یان چاوەڕوانکردنی هەڵوەشاندنەوەی تەواوی قەوارە سەربازییەکەی".
