شارپرێس:
یەکەم فڕۆکەی بەرهەمهێنراوی جۆری "ئێم کیو 25 ستینگرای" بێ فڕۆکەوان کە تایبەتە بە پڕکردنەوەی سووتەمەنیی لە ئاسماندا، یەکەم گەشتی تاقیکاری خۆی ئەنجامدا و بەمەش تواناکانی هێزی دەریایی ئەمریکا لە بواری پشتیوانی لۆجستیی بۆ فڕۆکە هەڵگرەکان بەهێزتر بوو. 

 
ئەم فڕۆکەیە کە لە لایەن کۆمپانیای بۆینگەوە بەرهەم هێنراوە، لە فڕۆکەخانەی "مید ئەمریکا" لە ویلایەتی ئیلینۆی هەڵفڕی و گەشتەکەی بە سەرکەوتوویی کۆتایی هات، کە ئەمەش وەرچەرخانێکی گرنگە بۆ داهاتووی فڕۆکەوانیی بێ فڕۆکەوان لەسەر کەشتییە فڕۆکە هەڵگرەکان.

ئەم تاقیکردنەوەیە دوای زنجیرەیەک پشکنینی زەمینیی و سیستمی هات، کە ئامانجیان دڵنیابوون بوو لە توانای کارکردنی فڕۆکەکە لە دۆخە جیاوازەکاندا. 

بڕیارە ئەم فڕۆکەیە بارگرانیی سەر شانی فڕۆکە جەنگییەکانی ئێف ئەی 18 سوپەر هۆرنێت کەم بکاتەوە کە ئێستا بۆ پڕکردنەوەی سووتەمەنیی بەکاردێن، بەمەش دەرفەت بۆ ئەو فڕۆکە بەسەرنشینانە دەڕەخسێنرێت کە زیاتر لە ئەرکە جەنگییەکاندا بەکاربهێنرێن.
 فڕۆکەی ئێم کیو 25 توانای هەڵگرتنی زیاتر لە 7.26 تۆن سووتەمەنیی هەیە و مەودای فڕینیشی دەگاتە 926 کیلۆمەتر.

جگە لە ئەرکی سەرەکیی، ئەم فڕۆکەیە توانای لاوەکیی وەک چاودێریکردن، کۆکردنەوەی زانیاریی و سیخوڕیکردنی هەیە، کە ئەمەش وادەکات لە داهاتوودا ئەرکەکانی فراوانتر بکرێن.

 نەریتی کارکردنی فڕۆکەکە بەشێوەیەکە کە ڕێگە بە تێکەڵبوونی نێوان فڕۆکەی بەسەرنشین و بێ فڕۆکەوان دەدات، کە ئەمەش بنەمای سەرەکیی فڕۆکەوانی سەردەمە.

 هێزی دەریایی ئەمریکا پلانی هەیە تا ساڵی دارایی 2027 فڕۆکەکە بخاتە خزمەتی فەرمیەوە و بۆ ئەم مەبەستەش بودجەی پێویستی تەرخان کردووە، سەرەڕای ئەو دواکەوتنانەی کە پێشتر لە بەرنامەکەدا ڕوویاندا.

چاودێران دەڵێن؛ ئەم دەستکەوتە نوێیە ڕێڕەوی تەکنەلۆژیای سەربازی دەگۆڕێت و کارایی هێزە دەریاییەکان لە بەرەکانی جەنگدا بە شێوەیەکی بەرچاو بەرز دەکاتەوە.