شارپرێس:

کەتائیبی ئیمام عەلی وەک سێیەم گروپی چەکداری عێراقی، جیابونەوەی خۆی لە هێزەکانی حەشدی شەعبی راگەیاند و دەستدەکەن بە پەیوەندیکردن بە هێزە فەرمییەکانی سەر بە حکومەتی عێراقەوە.

ئەمیندارێتی کەتائیبی ئیمام عەلی لەڕاگەیەنراوێکدا ئاماژەی بەوەکرد،" لەچوارچێوەی هەستکردن بە بەرپرسیارێتییە نیشتیمانییەکان و لەپێناو پاراستنی دەستکەوتەکان و سەروەری یەکێتی نیشتیمانی، فەرماندەیی کەتیبەکانی ئیمام عەلی بڕیاریدا بە جیابونەوە لە حەشدی شەعبی و دەستکردن بە رێکارەکانی هێشتنەوەی چەک لەدەستی دەوڵەتدا ".

ئەوەشیخستەڕوو،" بەڵێنمان بۆ لایەنگرانمان و کەسوکاری شەهیدان و برینداران دوپاتدەکەینەوە کە ئێمە لەسەر بەڵێنی خۆمان ماوین و پابەندین بە مانەوەمان لەسەر خاکی ئەم وڵاتە و پارێزگاریکردن لێی ".

ئەمیندارێتی کەتائیبی ئیمام عەلی باسی لەوەشکرد،" لەئێستادا مەیدانی شەڕ ئەوەیە کە وڵاتێکی بەهێزی خاوەن سەروەری تەواو بەسەر زەوی و ئاسمانی وڵاتەکە بونیادبنێین، کە سەرجەم رۆڵەکانی یەکبخات ".

ئەمەش لەکاتێکدایە، پێشتر هەریەک لە سەرایا سەلام و عەسائیبی ئەهلی حەق جیابونەوە و پەیوەندیکردنیان بە حکومەتی عێراقەوە راگەیاند، ئەوەش دوای فشاری بەردەوامی ئەمریکا دێت بۆ هەڵوەشاندنەوەی گروپە چەکدارییەکانی عێراق.