شارپرێس:

لەپەرەسەندنێکی خێراو مێژوییدا بۆ قۆناغی دوای بەشار ئەسەد، لیژنەی هێزە چەکدارەکانی ئەنجومەنی نوێنەرانی ئەمریکا بەزۆرینەی دەنگی 44 بەرامبەر 12، پڕۆژەیاسای بودجەی پێنتاگۆنی بۆ ساڵی دارایی 2027 پەسەندکرد، ئەم هەنگاوەیاساییە کە لەدوای کۆبونەوەیەکی چڕو درێژخایەنی یاسادانان كه‌ 14 کاتژمێری خایاندو تاووتوێی 900 هەموارکردن هات، پێگەی سەربازیی ڕوسیاو داهاتووی هێزەکانی سوریای دیموکرات (هەسەده‌) دەخاتە ناو جەرگەی نەخشەی نوێی ئەمنیی ناوچەکە.

ئەم هەموارکردنانە کە لەلایەن نوێنەری کۆمارییەکان جۆ ویڵسۆنەوە پێشکەشکراون، دۆسیەی سوریا لەچوارچێوەیەکی ناوخۆیی تەسکەوە دەگوازنەوە بۆ تاقیکردنەوەیەکی فراوانتری ستراتیژیەتی ئەمریکا لەڕۆژهەڵاتی ناوەڕاست.

هه‌سه‌ده‌ لەدڵی دەوڵەتی نوێدا؛ پێکهێنانی فەوج‌و لیوا سەربازییەکان‌و چونە ناو وەزارەتی بەرگریی
ئەم پێشھاتە یاساییە بەتەواوی ئاڕاستەی هاوکێشەکان بەرەو بەرژەوەندیی هێزەکانی ڕۆژاوای کوردستان دەگۆڕێت، کۆنگرێسی ئەمریکا بەم هەموارکردنانە پشتگیریی لەدروستکردنی دەوڵەتێکی سەقامگیر دەکات کە مافی کەمینە نەتەوەیی‌و ئاینییەکان بپارێزێت، لەم چوارچێوەیەشدا بڕیارەکان ڕاستەوخۆ پشتگیریی لەسێ خاڵى سەرەکیی دەکەن ئه‌وانیش:

یه‌كه‌م: دۆزینەوەی میکانیزم بۆ سودوەرگرتن لەتواناکانی هه‌سه‌ده‌ لەناو هێزە چەکدارەکانی سوریادا، تەنانەت لەسەر ئاستی فه‌وج‌و لیواو فیرقه‌ گەورەکان.
دوه‌م: بەخشینی پۆستی باڵاو جێگەی بڕیار بەکەسایەتییە سەرکردەکانی هه‌سه‌ده‌ لەناوخۆی وەزارەتی بەرگریی نوێی سوریادا.
سێیه‌م: ڕاسپاردنی بریكارى وەزارەتی بەرگریی بۆ کاروباری سیاسیی تا پێش 31ی کانونی دوەمی 2027، بۆ ئامادەکردنی ڕاپۆرتێک لەسەر شیاوی بەکارهێنانی پرۆگرامە ئەمنییەکانی ئەمریکا بەمەبەستی ڕاهێنان‌و بەرزکردنەوەی پیشەییبونی هێزە ئەمنییەکان لەسەر بنەمای مافی مرۆڤ‌و چاودێریی مەدەنی بەسەر سوپاوە.

نیشانەکردنی پێگەی ڕوسیا؛ حمێمیم‌و تەرتوس لەژێر چاودێریی پێنتاگۆندا
هاوتەریب لەگەڵ بەهێزکردنی پێگەی هەسەده‌، هەمواری یەکەم بەتوندی دژایەتی هەژمونی سەربازیی ڕوسیا دەکات، یاساکە داوا لەپێنتاگۆن دەکات کە پێش 31ی کانونی دوەمی ئه‌مساڵ، ڕاپۆرتێکی ورد پێشکەش بکات سەبارەت بەگەڕان بەدوای دەرفەتەکانی هاوکاری لەگەڵ حکومەتی نوێی سوریا بۆ کەمکردنەوەی نفوزی ڕوسیا یان ناچارکردنیان بەکشانەوە لەهەردوو بنکەی "حمێمیم‌و تەرتوس".

هه‌روه‌ها لێکۆڵینەوە لەوەی ئایا مۆسکۆ ئەم بنکانە وەک پردی لۆجستی بۆ پڕچەککردنی بریکارەکانی ئێران لەناوچەکەدا بەکارده‌هێنێت، یان بۆ گواستنەوەی چەکدار لەسوریاو ئەفریقاوە بۆ بەرەکانی شەڕی ڕوسیا لەئۆکرانیا.

ئەم جموجوڵە هاوكاته‌ لەگەڵ ڕاپۆرتە نێودەوڵەتییە نوێیەکان کە لەڕێگەی وێنەی مانگە دەستکردەکانەوە ئاشکرایانکردوە؛ کەشتیی بارهەڵگری ڕوسی (سپارتا) لەمانگی ئایاری ڕابردودا پێداویستی گەیاندوەتە بنکەی حمێمیم لەڕێگەی بەندەری تەرتوسەوە، ئەمەش یەکەم پرۆسەی دابینکردنی پێداویستیی ئاشکرای مۆسکۆیە لەدوای ڕوخانی به‌شار ئەسەد.

ئاراستەیەکی نوێ؛ ئاسایش لەپێش سیاسەتی دەرەوەوەیە
ئەم گۆڕانکارییانە درێژکراوەی ڕەوتی نوێی واشنتۆنن؛ بەوپێیەی ئەنجومەنی پیرانی ئەمریکا پێشتر لەکانونی یەکەمی 2025دا بڕگەیەکی بۆ هەڵوەشاندنەوەی سزاکانی "قەیسەر" لەسەر سوریا پەسەندکردبوو، ئەمەش دەریدەخات کە دۆسیەی سوریا لەواشنتۆن ئیتر لەڕێگەی دەروازەی "ئاسایش‌و بەرگریی"یەوە بەڕێوەدەبرێت نەک تەنها سیاسەتی دەرەوە؛ واتە گۆڕینی ئامرازە کۆنەکانی فشار لەبەرامبەر سەپاندنی مەرجی نوێ بۆ پێکهاتەی سوپاو داهاتوی هێزە کوردییەکان.

خوێندنەوەیەک بۆ هاوسەنگییەکان؛ تاقیکردنەوەیەکی سەخت بۆ دیمەشق
یونس کەریم پسپۆڕو توێژەری ئابوری ئاماژە بەوەدەکات، هەرچەندە ئەم هەموارکردنانە لەڕوی یاساییەوە بەڕەهایی "ئیلزامی نین"، بەڵام لەعورفی یاسادانانی ئەمریکادا هێزێکی کرداریی گەورەیان هەیەو مامەڵەکردن لەگەڵیاندا لەلایەن پێنتاگۆنەوە دەبێتە ئەرک، بەتایبەت کە یەکەم ڕاپۆرت کۆتایی ئەمساڵ بەرزدەکرێتەوە.

کەریم پێیوایە، کۆنگرێس سوریا وەک هێڵێکی تێکەڵبوی نفوزی ڕوسیا، حساباتی ئێران‌و داڕشتنەوەی دەزگاکانی دەوڵەت دەبینێت، بۆیە، هۆشداریدەدات کە پێویستە حکومەتی نوێی سوریا تەنها چاودێر نەبێت، بەڵکو دەبێت خۆی دەستپێشخەربێت لەڕونکردنەوەی ئەولەویەتەکانی بۆ ئەندامانی کۆنگرێس، داپێتا ڕێکخستنە ئەمریکییەکان نەبنە ڕێڕوێکی یەکلایەنە کە مەرج لەدەرەوە بسەپێنێت‌و پێگەی هێزە ناوخۆییەکانی وەک هەسەده‌ دیاریبکات.

سوریاو بەتایبەت ڕۆژئاوای کوردستان لەئێستادا لەبەردەم تاقیکردنەوەیەکی مێژوییدان؛ چۆن بتوانرێت کۆتایی بە میراتی قورسی بنکە سەربازییەکانی ڕووسیا بهێنرێت بەبێ ئەوەی وڵاتەکە بکەوێتە ناو بۆشاییەکی ئەمنیی کوشندەو چۆن دامەزراوەی سەربازیی نوێ سەرلەنوێ دابڕێژرێتەوە کە تێیدا هەسەده‌ پارێزگاری لەپێگەو دەستکەوتە ستراتیژییەکانی خۆی بکات.