شارپرێس:
لەکاتێکدا عێراق لەسەر گڕکانی دەستگیرکردنی بەرپرسانی باڵایە، سەرۆکی ڕەوتی حیکمەی نیشتمانی بەلێدوانێکی ئاگرینو چاوەڕواننەکراو هاتە ناو هێڵی ڕوداوەکانو بەتەواوی پشتیوانی خۆی بۆ ڕاپەڕینە یاساییو ئەمنییەکەی دەسەڵاتی دادوەرییو جێبەجێکردن ڕاگەیاند، عەممار حەکیم ڕایگەیاند، "ئەم هێرشە دژە گەندەڵییە گەورەیە، وەرچەرخانێکی مێژوییە بۆ سەروەریی یاساو پاراستنی سامانی تاڵانکراوی گەل".
عەممار حەکیم لەپەیامەكهیدا جەختیکردەوە، "سەرکەوتنی ئهم ڕاپهڕینه دژه گهندهڵییهى دهستیپێكردوه، پێویستی بەپشتیوانییەکی نیشتمانیی فراوان هەیە، بۆیه نابێت هیچ جۆرە بەرژەوەندییەکی سیاسیی، حزبی یان تائیفی ببێتە ڕێگر لەبەردەم ڕاپێچکردنی گهندهڵكاران بۆ پشت شیشەکانی زیندانو ئیتر سەردەمی چاوپۆشی سیاسیی کۆتاییهاتوە".
سەرۆکی ڕەوتی حیکمە، تەنها بەپشتگیریکردنی دەستگیرکردنەکان نەوەستاوه، بەڵکو داوای لەتەواوی هێزە کۆمەڵایەتییەکان، خێڵەکانو میدیاكانیش کردوه بڕژێنە ناو ئەم بەرەی جەنگە میدیاییو مەیدانییە دژی شێرپەنجەی گەندەڵی.
ئەو ڕایگەیاند، "دەبێت کولتوری لێپرسینەوەو دەسپاکی ببێتە یاسای یەکەم لەوڵاتدا بۆ بونیادنانی دەوڵەتێکی دادپەروەرو بەهێز کە تێیدا تەنها یاسا فەرمانڕەوابێتو مافی هاوڵاتیان بپارێزرێت".
چاودێرانی سیاسیی پێیانوایە، ئەو هەڵوێستەى حەکیم، چەترێکی سیاسی قورس دەبەخشێتە حکومەتەکەی عەلی زەیدیی بۆ ئەوەی لەگەڕی داهاتودا سەرکردەو بازرگانە گەورەکانی دیكهش ڕاپێچی دادگا بکاتو پێدەنێتە قۆناغێکی ئێجگار ههستیار.
