شارپرێس:

دەستەی ڕاگەیاندن و پەیوەندییەکانی عێراق بڕیاریدا دەستبەجێ فرۆشتنی سیمکارت لە شوێنە نافەرمییەکانی هەرێمی کوردستان رابگیرێت، دەشڵێت، ئەو بڕیارە کاتییە و بەهۆی سکاڵای هاوڵاتییانەوە بوە.

دەستەی ڕاگەیاندن و پەیوەندییەکانی عێراق لەڕاگەیەنراوێكدا ئاماژەی بەوەکرد،" بەبڕیاری بەلیغ ئەبو کلل، سەرۆکی دەزگای جێبەجێکاری دەستەکە، فرۆشتنی سیمکارتی مۆبایل لەسەرجەم بریکار و شوێنەکانی فرۆشتنی سیمکارت لە پارێزگاکانی هەرێمی کوردستان بەشێوەیەکی کاتیی راگیرا و تەنها لە ناوەندە سەرەکییەکانی کۆمپانیا مۆڵەتپێدراوەکان دەفرۆشرێت ".

ئەوەشیخستەڕوو، ئەم بڕیارە کاتییەو تاکو کۆتاییهاتنی رێکارەکانی رێکخستنەوە و پشتڕاستکردنەوەی ئەلیکترۆنی و ئەمنی جێبەجێ دەکرێت.

دەستەی ڕاگەیاندن و پەیوەندییەکان باسی لەوەشکرد، ئەم بڕیارە دوای ئەوە هات کە چەند سکاڵایەکمان بەدەست گەیشت، کە باس لەوەدەکرا کۆمەڵێک هاوڵاتی بەبێ ئاگاداریی و رەزامەندی خۆیان سیمکارتیان بەناوەوە کراوە، ئەوەش لێککەوتە و زیانی یاسایی و دارایی و کۆمەڵایەتی بەدواوە دێت.


دەستەی ڕاگەیاندن و پەیوەندییەکانی عێراق دەشڵێت، ئەو رێککارە ئامانج لێی سنوردارکردنی بەدەستگەیشتنی سیمکارت بۆ هاوڵاتییان نییە، بەڵکو بۆ ئەوەیە دڵنیایی بدرێت لەوەی سەرجەم سیمکارتەکان بەپێی رێکارە یاسایی و هونەرییەکان بفرۆشرێن و رێگری بکرێت لە حاڵەتەکان ساختەکردن و خراپ بەکارهێنانی ئەو خزمەتگوزارییانە.