شارپرێس:
سەرۆک وەزیرانی تورکیا رایگەیاند ئەوانەی هەوڵی دروستکردنی دەوڵەت لە
سوریا و عێراق دەدەن خەیاڵیان خاوە رێگە نادەن بگەنە ئامانجەکانیان.
دەزگاکانی راگەیاندنی تورکیا ئەمڕۆ دووشەممە ١٨ی ئەیلول بڵاویانکردەوە
بیناڵی یەڵدرم سەرۆک وەزیرانی ئەو وڵاتە رایگەیاندووە هەر هەوڵێک بۆ دروستکردنی
دەوڵەت لە سوریا و عێراق بە مەترسی بۆ سەر ئاسایشی نیشتیمانی لێکی ئەدەنەوە و هەر
رێکارێک پێویست بێت بەرانبەری دەیگرنە بەر.
یەڵدرم ئاماژەی بەوەداوە ئەوان هۆشداری پێویستیان داوەتە ئەو کەس و
لایەنانەی هەوڵی دروستکردنی دەوڵەتی "دەستکرد" دەدەن و لە کاتی خۆیدا
وەڵامی گونجاویان دەبێت.
قسەکانی یەڵدرم لە کاتێکدایە بریارە ٢٥ی ئەم مانگە باشوری کوردستان
ریفراندۆم بۆ سەربەخۆیی و جیابونەوە لە عێراق ئەنجام بدات ئەوەش کاردانەوەی توندی
تورکیای بە دوای خۆیدا هێناوە.
یەڵدرم ئاماژەی بەوەکردووە "پێویستە هەمووان ئەوە بخەنە مێشکیانەوە
با هیچ کەسێک لەسەر سنوورەکانی باشوورمان لە سووریا و لە عێراق هەوڵی ئەوە نەدات ئەمری
واقع بخوڵقێنێت تورکیا لەوبارەیەوە توندە و هۆشداریی پێویستی داوە ئەگەر هۆشدارییەکان
جێگە نەگرن، ئەوا تۆزقاڵێک سڵ لە گرتنەبەری رێکاری پێویست ناکەینەوە''.
پیشتریش چەند جارێک بەرپرسانی باڵای تورکیا لە سەر هەمان پرس هۆشداریان
داوەتە هەرێمی کوردستان و رایانگەیاندووە کاردانەوەی توندیان بەرانبەر بڕیارەکە
دەبێت.
ر.ا