سەركەوت شەمسەدین: نەوەی نوێ‌ بەتەواوی لەحیزبی-بوون خراوە و كراوە بەباند‌و هچ كەس خاوەنی بڕیار نییە

sharpress.net

5618 جار خوێندراوه‌ته‌وه

28/04/2019‌

شارپرێس:
سەركەوت شەمسەدین یەكێك لەدامەزرێنەرانی جوڵانەوەی نەوەی نوێ‌، لەنوێترین چاوپێكەوتنی لەگەڵ شارپرێس دەڵێت: نەوەی نوێ‌ بەتەواوی لەحیزبی-بوون خراوە و كراوە بەباند‌و هچ كەس خاوەنی بڕیار نییە

سەركەوت شەمسەدین، كە یەكێكە لەناڕازییەكانی نەوەی نوێ‌ دەشڵێت: لەئێستادا خێزان‌و نزیكەكانی سەرۆكی جوڵانەوەكە تەحەكوم بەمیدیا و دارایی جوڵانەوەكە دەكەن و نەوەی نوێ و نالیا كراون بەیەك جیاكردنەوەیان ئەستەم بوو، بۆیە حیزبێك بیەوێت ببێتە بەدیلی پارتی و یەكێتی چۆن دەبێت ببێتە كۆپی ئەوان، بەڵكو دەبێت لە ئاستێكی باڵاتر سیاسەت بكات.

سەركەوت شەمسەدین، لەو چاوپێكەوتنە وردەكاری زیاتر لەبارەی سەرهەڵدانی كێشەكان دەخاتەڕوو، هەروەها باسی ئەوەش دەكات لەداهاتوو ئامانجیان دەبێت‌و لەئێستاشدا لەگفتوگۆدان بۆ ئەو مەبەستە.

شارپرێس: نەوەی نوێ وەك بزووتنەوەیەكی مەدەنی لەماوەیەكی كەمدا توانی تارادەیەكی باش خۆی بناسێنێت‌و لەدوو هەڵبژاردنیشدا توانی سەركەوتنی بەرچاو بەدەست بهێنێت،  بەڵام ئێستا دەردەكەوێت كێشەو گرفتی ناوخۆی زۆرە، ئایا ئەم گرفتانە لەكوێوە سەرچاوەیان گرت؟
سەركەوت شەمسەدین: گرنگە وەڵامی ئەو پرسیارە بدەینەوە، كە ئێمە نەوەی نوێمان بۆ دامەزراند؟ لە بەیانەكەی ۲۱ ی نیسان بەروونی رامانگەیاندووە، كە سێ خاڵی سەرەكی هۆكاری شكستی سیاسییە لەكوردستان‌و رێگربووە لە دروستبوونی دانەزراوەی نیشتمانی، سەروەری یاسا، پتەوكردنی پایەكانی دیموكراسی‌و پاراستنی شكۆی تاك، ئەو سێ خاڵەش بریتین لە:
تێكەڵكردنی حیزب و خێزان
تێكەڵكردنی حیزب و بزنس
نەمانی بریاری بەكۆمەڵ

بەداخەوە ئێمە لە نەوەی نوێ شكستمان هێنا لەرێگریكردن لەدوبارەبوونەوەی چیرۆكی تراژیدی ۷٠ ساڵی حیزبی كوردی، كە لە سەرەتای دامەزراندن و بەستنی یەكەم كۆنگرەوە كارمان بۆ ئەوە كردووە چانسێك بدەینە سەرۆكی جوڵانەوەكە تا لە مێنتاڵێتی بزنسمان و سەرۆكی كۆمپانیاوە وردە وردە فێری كاری سیاسی و بریاری بەكۆمەڵ دەبێت و رابێت لەسەر ئەوەی، كە شەریكی سیاسی جیایە لەكارمەند، بۆ ئەو مەبەستەش كاری زۆرمان كرد و ئۆفیس و بۆرد و گروپی ستراتیژیمان پێكهێنا، كە بەشداربن لەدروستكردنی بریار، بریار بوو پەرلەمان‌و ئەنجومەنی گەل دروستبكرێت بۆ راوێژ و كۆكردنەوەی بیرورای جیا و دروستكردنی دیبەیت، كە هەر دروستكردنی هۆڵی سپی بۆ ئەنجوومەنی گەل بوو نەك هۆڵی كۆنسێرت. 

بەڵام بەشێوەی تەدریجی‌و لەدوای هەڵبژاردنەكانی عێراق سەرۆكی جوڵانەوەكە جارێ بەتۆمەتی جیا ئەنجوومەنی باڵای سڕكرد و لەكاری خست و چەند كەسێكی دورخستەوە بەتۆمەتی سیخوری، بەڵام ئێستا ئەو ئەندامە دورخراوانەی هێناوەتەوە، ئۆفیسەكانی نەوەی نوێ و میدیا و سۆشیاڵ میدیا بێ دەسەڵات و بێ بەهاكران و هەموویان خرانە ژێردەستی كۆمپانیای نالیا و سكرتێری سەرۆكی جوڵانەوەكە، كە ئەندامانی خێزانی خۆیبوون، بەجۆرێ جوڵانەوەكە كراوە بەپەراوێزێك بۆ ئۆفیسی حساباتی كۆمپانیاو تەنانەت ئەو پارەیەی پەرلەمانتاران دەیدەن دەچێتەوە كۆمپانیای نالیا. 

پاشان بەشێنەیی خێزان، كە نزیكەكانی سەرۆكی جوڵانەوەكە تەحەكوم بەمیدیا و دارایی جوڵانەوەكە دەكەن و نەوەی نوێ و نالیا كرابوون بە یەك جیاكردنەوەیان ئەستەم بوو، بۆیە حیزبێك بیەوێت ببێتە بەدیلی پارتی و یەكێتی چۆن دەبێت ببێتە كۆپی ئەوان، بەڵكو دەبێت لە ئاستێكی باڵاتر سیاسەت بكات.

شارپرێس: ئێستا ئێوە بەراستی گرفتی ئیدارە و بەرێوەبردنتان هەیە یان گرفتی دنیابینی‌و سیاسی و رێكخراوەیی؟
سەركەوت شەمسەدین: ئێمە دان بەوەدا دەنێین، كە ئەم جوڵانەوەی ئێستا ئەوە نییە ئێمە بنەماكانیمان دارشت و بەتەواوی لەحیزبی-بوون خراوە و كراوە بە باند و هچ كەس خاوەنی بریار نییە جگە كە یەك كەس، هەروەها هیچ دەرفەتێك بۆ رای جیاواز نەماوەو بەتەواوی بووە بە باندێكی سیاسی بەكاردهێنرێت بۆ مەرامی تایبەتی‌و خێزانی. 

هەموو میدیا و سۆشیاڵ میدیا نەوەی نوێ كەوتە دەست سەرۆك و ئەندامانی خێزان و كەسە نزیكەكانی و ئەوانەی پەیوەندی خزمایەتیان هەیە لەلایەن ئەوانەوە ئاراستەكراوە، ئێمە پاش چەندین مانگ گفتوگۆ و راگۆرینەوە و پێشنیازكردنی پرۆژەی جیاجیا و تورەبوون و گرژی، بەڵام دۆخەكە زیاتر بە ئاراستەی بە باندبوون رۆشت بە ناچاری وەك بەرپرسیاری سەرشانمان و لە سۆنگەی ئەوەی سیاسەت دەبێت رایگشتی لێ ئاگاداربكەیت رۆژی ۲۱ ی نیسان هەڵوێستی خۆمان وەك ئاراستەیەكی سیاسی جیا روونكردەوە. 

بەڵام گرنگە خەڵك بزانێت ئێمە خۆمان بەسەرمەشقی دەنگی ئۆپۆزسیۆن دەزانین‌و لەپەرلەمان جدیتر كاردەكەین بۆ دژایەتیكردنی گەندەڵی، بەڵام ئێمە دەبینە ئۆپۆزسیۆنێك كە دوربێت لەسەفەقاتی ژێر بەژێر و دەستەمۆی دەسەڵات، كە لە پەرلەمانی عێراق و كوردستان دەرفەت بەفیرۆ نادەین بۆ دروستكردنی فشار و نوێنەرایەتیكردنی راستەقینەی خەڵك.

شارپرێس: تا ئەورادەیەكە فاسیلە دروست بووە لەنێوانتاندا كە پێكنەیەنەوە؟.
سەركەوت شەمسەدین: ئەم هەڵوێستەی ئێمە روونە، كە هیچ باوەرمان بە كاركردن لەگەڵ سەرۆكی ئێستای ئەو جوڵانەوەیە نەماوە و ئاراستەیەكی سیاسی جیاین ‌و لە ئایندەش دا هەنگاوەكانی ئێمە رووندەبنەوە.

شارپرێس، باشە، كە ئەو گرفتانە هەبووە بۆ لەسەرەتاوە رەخنەتان نەگرتووەو بەرتان بەو دیاردانە نەگرتووە، بۆ نموونە لە پەیجەكانتانەوە هێرشی زۆر توندو تۆمەتباركردن كراوە، بەتایبەت بۆ سەر رۆژنامەنووسان، ئێوە ئەوكاتە هەڵوێستان چی بوو؟
سەركەوت شەمسەدین: من پێشتر باسمكرد، كە ئێمە سەرەتا دەرفەتمان بەسەرۆكی جوڵانەوەكەدا و را هەڵبژاردنەكانی عێراقیش ئێمە وەك سەركردەكانی ئەو جوڵانەوەیە هەنگاوی گرنگ چووینە پێش بۆ دامەزراندنی جوڵانەوەیەك، كە پارادایمێكی سیاسی جیا بێت، بەڵام دوای هەڵبژاردنەكانی عێراق لە ئایاری ۲٠۱۸ ئیتر دۆخەكە لەكۆنترۆڵی ئێمە نەما و وردە وردە گرژی و رەخنە و دوركەوتنەوە دەستیپێكرد تا لە ۲۱ ی نیسان گەشتە لوتكە. 

بابەتی پۆپۆلیزم و پەیجی سێبەر هەر لەسەرەتاوە ئێمە دژی بووین و چەندین گفتوگۆی توند و هەڵوێست وەرگرتن بەرامبەر ئەو رەفتارانە هەبووە بەڵام دیارە زیاتر لەناوخۆ نەك رایگشتی.

شارپرێس: بەنیازن چۆن درێژە بەكارەكانتان بدەن، بەرنامەتان چییەو ئایندەی نەوەی نوێ چی بەسەر دێت؟
سەركەوت شەمسەدین: ئێمە ئێستا بەرایگشتیمان راگەاند، كە چی دەگوزەرێت و هۆكاری هەڵوێستەكەی ئێمە چییە، ئێستا ئەوە روونە، كە ئێمە ئاراستەیەكی سیاسی جیاین‌و ەسرۆكی جوڵانەوەكە تەعبیر لە ئێمە ناكات و هیچ رەبتێك لەنێوانمان نەماوە، بەڵام لە گفتوگۆداین سەبارەت بەئایندەی نەوەی نوێ و رەنگە لە چەند هەفتەی ئایندە زیاتر بەرچاوتان رونبێت.

شارپرێس: چەند جارێكە هەڵوێستەكەی ئێوە لەلایەن سەرۆكی نەوەی نوێ بەخیانەت دەدریتە قەلەم ئێوە لەو بارەوە دەڵێن چی؟
سەركەوت شەمسەدین: ئەوە كلتوری خێڵە، كە بوونی بیرورای جیا و ئاراستەی جیا لە ناو حیزبدا بەخیانەت ناودەبات، لای ئێمە حیزب پیرۆز نییە، بەڵكو مەبدەئ پیرۆزە، شكۆی مرۆڤ پیرۆزە، نەك ئیهانەكردن و تەخوینكردنی ئەوانەی رەخنەیان لێت هەیە لە پەیجە سێبەر و بێسەروبەرەكانەوە.  

پاشان خیانەت چییە لای ئەوان؟ خیانەت ئەوەیە رێگری بكەیت لەوەی پرۆژەیەكی سیاسی بكرێتە قوربانی بەرژەوەندی بازرگانی و كۆنتراكتی بازرگانی؟ خیانەت ئەوەیە رێگری لەسەرۆكی حیزبەكەت بكەیت كە حزبەكە بكات بە خێزانی؟  ئێمە لەجاران تۆكمەتر وەك ئۆپۆزسیۆنێكی كارا نوێنەرایەتی خەڵكی خۆمان دەكەین. 

تۆ تەماشاكە لەو رۆژەی ئێمە دیدەگای خۆمان بۆ رایگشتی بەیانكردووە لەبری ئارگومێنت و گفتوگۆی عەقڵانی هەررۆژێ تۆمەتێ بڵاودەكەنەوە و جارێ تەخوین، جارێ دەڵێن "نمەك سوێر" و جارێ دەڵێن نانمان خواردووە پێكەوە و میوانداریمان كردووە، هەرگیز بینیوتە سەركردەی حیزبێك باسی میوانداری و نانخواردن بكات لەگەڵ ئەوانەی كاری سیاسییان پێكەوە كردووە، یان باسی بەرنامەی سیاسی دەكات؟






ads

زۆرترین خوێندراوە

  • ڕۆژ
  • هەفتە
  • مانگ
ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved