دادگاییكردنی ڕەفعەت ئەسەد بەتۆمەتی خواردنی ماڵی گشتی و سپییكردنەوەی پارە

sharpress.net

1075 جار خوێندراوه‌ته‌وه

05/06/2019‌

شارپرێس: 
راپۆرتە میدیاییەكان باس لەوە دەكەن، كە رەفعەت ئەسەدی مامی بەشار ئەسەدی سەرۆكی سوریا لەنێوان ٩ بۆ ١٨ی كانوونی یەكەم لەپاریسی پایتەختی فەرەنسا لەسەر تۆمەتەكانی بردنی ماڵی گشتی و سپیكردنەوەی پارە دادگایی دەكرێت .

دوای ٥ ساڵ لە لێكۆڵینەوە ، دادوەری فەرەنسی ڕینۆ ڤان رۆیمبكی فەرمانی كرد بەوەی لە ١٥ ی ئەپریل ڕەفعەت ئەسەد دادگایی بكرێت ، تاوەكو دەربكەوێت ئایا ناوبراو دەستی هەبوو لە خواردنی ماڵی گشتی و سپییكردنەوەی پارەی سوری ، ئەوە جگە لەبەنایاسایی هێنانی خزمەتگوزاری ماڵان و كارپێكردنیان لەماڵەكەی خۆی و دانی پارەكەیان بە نەختی .

رەفعەت ئەسەدی تەمە (٨١ ساڵ) لەناوەراستی هەشتاكانەوە لەئەوروپا دەژی، لەساڵی ٢٠١٦ شەوە لەوكاتەوەی لەپاریس تۆمەتی ئاراستە كراوە جموجۆڵە نێودەوڵەتییەكانی لەژێر چاودێری دادوەریدایە .

ڕەفعەت ئەسەد پێشتر یەكێك بوو لە پایەكانی رژێمی سوریا بەسەرۆكایەتی حافز ئەسەدی برای ، فەرماندەی یەكەكانی بەرگری نیشتمانی بوو، كە رۆڵێكی سەرەكی هەبوو لە سەركوتكردنی ئۆپۆزیسیۆن لە شاری حەما لەساڵی ١٩٨٢ .

لەساڵی ١٩٨٤ دوای ئەوەی بەشداری لە یاخیبوونێك كرد لە دژی حافز ئەسەدی برای ناچاركرا سوریا بەجێبهێلێت .

لەماوەی مانەوەی لەئەوروپا لەگەڵ چوار ژنەكەی و دەستوپێوەندێك، كە ١٥٠ بۆ ٢٠٠ كەس دەبن ، موڵك و ماڵ و خانووبەرەیەكی زۆری بەیەكەوەنا بەجۆرێك گومانی درووست كرد بەوەی ئەو موڵكانە بەشێوەیەكی ڕەوا كۆكرابێتەوە .

لەساڵی ٢٠١٤ و دوای ئەوەی رێكخراوی ناحكوومی شیربا، كە دژی گەندەڵی دەجەنگێت داوایەكی یاسایی لەسەر تۆماركرد ، دەستكرا بە لێكۆڵینەوە كردن لەگەڵی لەسەر ئەوەی چۆن ئەو ئیمپراتۆرییەتە خانوبەرەییەی بەیەكەوەناوە .

لە فەرەنسا دەستگیراوە بەسەر هەموو ئەو خانوبەرەیەی هەیەتی ، لەدیارترینیان دوو هۆتێل و نزیكەی ٤٠ شوقە لە گەڕەكە كەشخەكانی پاریس ، لەكاتێكدا لە ئیسپانیا زیاتر لە ٥٠٠ خانوبەرەی هەیە كە نرخەكانیان بە زیاتر لە ٦٠٠ ملیۆن دۆلار دەخەملێنرێت .

وەرگێران: ئاكۆ عەبدوڵڵا ئاڵی





ads

زۆرترین خوێندراوە

  • ڕۆژ
  • هەفتە
  • مانگ
ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved