شارپرێس:

سەرچاوەیەک لەناو ئەنجوومەنی وەزیرانی عێراق ئاشکرای کردووە کە حکوومەت بەمەبەستی  دابینکردنی مووچەی مانگەکانی ئایار و حوزەیرانی داهاتووی فەرمانبەران قەرز لە سێ بانکی حکوومی دەکات .
ئەو سەرچاوەیە کە داوای کردووە ناوەکەی ئاشکرا نەکرێت بە ئاژانسی شەفەق نیوزی راگەیاندووە کە حکوومەتی عێراق بۆ دابینکردنی مووچەی مانگەکانی ئایار و حوزەیرانی داهاتوو پەنا دەباتە بەر قەرزکردنی ناوخۆیی لە بانکە حکوومییەکان .

بەقسەی ئەو سەرچاوەیە وەزارەتی دارایی دوای وەرگرتنی رەزامەندی لە ئەنجوومەنی وەزیران ، قەرزی دارایی لە بانکەکانی رافیدەین و ڕەشید و بانکی عەقاری کردووە .

بەهۆی هەرەسهێنانی نرخەکانی نەوت لە بازارەکانی جیهان کە لە ئەنجامی بڵاوبوونەوەی ڤایرۆسی کۆڕۆناوە درووست بووە عێراق تووشی قەیرانێکی قوڵیی دارایی و ئابووری بووە کە کاریگەری کردۆتە سەر دابینکردنی مووچەی فەرمانبەران .

بۆ دابینکردنی خەرجییەکانی دەوڵەت عێراق بەڕێژەی ٩٥٪ پشت بە فرۆشتنی نەوتی خاو دەبەستێت ، کە کۆی داهاتی فرۆشتنی مانگی نیسان تەنیا ١،٥ ملیار دۆلار بووە لەکاتێکدا مانگانە پێویستی بە پێنج ملیار دۆلار هەیە .

وەرگێڕان : ئاکۆ عەبدوڵڵا ئاڵی