ڕووسیا بۆ لێدانی هێزەکانی سەر بە تورکیا فرۆکەی جەنگی رەوانەی لیبیا دەکات

جیهان

22/05/2020‌ 2091 جار خوێندراوه‌ته‌وه

شارپرێس:

فەتحی پاشا وەزیری ناوخۆی حکوومەتەکەی فایز سەڕراجی لایەنگری ئەنقەرە ئاشکرای کردووە کە لەمدواییە رووسیا لانیکەم هەشت فرۆکەی جەنگی بۆ پشتیوانیکردنی هێزەکانی مووشیر خەلیفە حەفتەر ڕەوانەی لیبیا کردووە .

پاشا لەلێدوانێکدا بۆ ئاژانسی " بلوومبێرگ" باسی لەوە کردووە کە ئەو فرۆکانە لە بنکەی ئاسمانی حومەیمیمی سوریاوە رەوانەی ئەو وڵاتە کراون و فرۆکەی سەردەمی یەکێتی سۆڤێتی پێشوون کە شەش فرۆکەیانە لە جۆری " Mig-29" و دوو دانەیان ل جۆری " Su-24 " ن و گەیشتوونەتە رۆژهەڵاتی لیبیا کە لەژێر کۆنترۆڵی هێزەکانی سەر بە سوپای نیشتیمانی لیبیادایە .

هەرچی لایەنی رووسییە هێشتا هیچ ڕوونکردنەوەیەکیان لەبارەی چوونی ئەو فرۆکانە بۆ لیبیا نەداوە .

بەگوێرەی ئاژانسی بلوومبێرگ هێزەکانی جەنەراڵ مووشیر خەلیفە حەفتەر کە کەلایەن رووسیا و میسر و فەرەنساو و ئیماراتەوە پشتیوانی دەکرێت رایگەیاندووە کە گەورەترین هەڵمەتی ئاسمانی دەکاتە سەر ئامانجەکانی تورکیا لە لیبیا .

رۆژی دووشەممە هێزەکانی سەر بە حکوومەتی فایز سەرراج توانیان بنکەی ئاسمانی وەتییە کە بنکەیەی سترارتیژییە ، هاوکات لەگەڵیشیدا ژووری ئۆپەراسیۆنە سەرەکییەکانی سەر بە حەفتەر لەناوچە و هەردوو شاری بەدر و تیجی لە رۆژئاوای لیبیا کۆنترۆڵ بکەن .

لەمانگی نیسانی ساڵی ٢٠١٩ وە هێزەکانی سەر بە مووشیر خەلیفە حەفتەر هەڵمەتێکی سەربازی فراوانیان بۆ رووخاندنی حکوومەتەکەی فایز سەرراج لە تەرابلووسی پایتەختی لیبیا دەستپێکردووە کە لەلایەن تورکیا و قەتەرەوە پشتیوانی لێدەکرێت ، کە بەهۆیەوە هەزاران کەس لە هەردوولا گیانیان لەدەستداوە و زەرەر و زیانێکی گەورەشی بە ژێرخانی ئابووری ئەو وڵاتە گەیاندووە .

وەرگێڕان : ئاکۆ عەبدوڵڵا ئاڵی