واشنتۆن رەزامەندی پیشاندا 105 فرۆكەی جۆری “F-35” بەژاپۆن بفرۆشێت

جیهان

12/07/2020‌ 294 جار خوێندراوه‌ته‌وه

شارپرێس: 
بەگوێرەی ئاژانسی هەماهەنگی بەرگری سەر بە وەزارەتی بەرگری ئەمەریكا، واشنتۆن رەزامەندی دەربڕیوە ١٠٥ فرۆكەی جۆری “F-35” بە بەهای ٢٣ ملیار دۆلار بەوڵاتی ژاپۆن بفرۆشێت .

پێشتر حكومەتی ژاپۆن داوای لە ئەمریكا كردبوو، كە گرێبەستی فرۆشتنی ٦٣ فرۆكەی "F-35 A" و ٤٢ فرۆكەی "F-35 B" ، كە دەتوانن بەشێوەی ستوونی بنیشنەوە، لەگەڵ ١١٠ بزوێنەری ئەو فرۆكانەی لەگەڵ واژوو بكات .

وەزارەتی دەرەوەی ئەمەریكا پێیوایە گرێبەستەكە لەبەرژەوەندی ئەمەریكایە بەوپێیەی یارمەتی بەهێزبوونی یەكێك لە گەورەترین هاوپەیمانەكانی واشنتۆن دەدات.

وابڕیارە فرۆكە نوێكانی جۆری  F-35 ، شوێنی فرۆكە كۆنەكانی جۆری  F-4 فانتۆم بگرێتەوە، كە ماوەیەكی زۆرە لەناو هێزە ئاسمانییەكانی ژاپۆندا خزمەت دەكات.

فڕۆكەی F-35 فرۆكەیەكی فرە ئەركە و لەنەوەی پێنجەمی فرۆكە جەنگییەكانە و لەسەر بنەمای فرۆكەی F-22 Raptor   پەرەپێدراوە، لەلایەن كۆمانیای لۆكهید مارتنی ئەمەریكییەوە دروست دەكرێت، خاوەن تایبەمتمەندی بەرزە و دەتوانێت خۆی لە رادارەكان بشارێتەوە.

وەرگێران: ئاكۆ ئاڵی