شارپرێس: 
ئاژانسی هەواڵی "رۆیتەرز" لە راپۆرتێکدا باسی لەوە کردووە کە بەشێکی زۆری ئێزدییەکانی عێراق و هەرێمی کوردستان متمانەیان بەپلانی ئاوەدانکردنەوەی شەنگال نییە کە بەپێی ئەو ڕێککەوتنەی لەم دواییە لەنێوان حکوومەتی هەرێمی کوردستان حکوومەتەکەی مستەفا کازمی واژۆ کراو هەردوولا بە ڕێکەوتنێکی مێژووییان وەسف کرد .

ئاژانسەکە لەسەر زاری ئێزیدییەکانەوە گواستوویەتییەوە کە ئەگەری هەیە ڕێککەوتنەکە دۆخی ئەمنی ناوچەکە هێور بکاتەوە، بەڵام لەڕووی ئاوەدانکردنەوە و بنیادنانەوە رەنگە دۆخەکە ئاڵۆزتر بکات، بەتایبەت کە ناوچەکە لەژێر کۆنترۆڵی چەندین گرووپ و هێزی چەکداریدایە و وا بەئاسانی ڕێگە بە گرێبەستە بازرگانییەکانی ئاوەدانکردنەوەی ناوچەکە و هاتنی ڕێکخراوە مرۆییە نێودەوڵەتیی و عێراقییەکان بۆ نادەن، مەگەر تەنیا ڕێژەیەکی دیاریکراو لە پشکی بودجەی پرۆژە خزمەتگوازرییەکانیان بەربکەوێت.

هەروەها ئەوەش خراوەتەڕوو کە پلانی حکوومەت بۆ سەپاندنی ئاسایش و ڕێگەدان بە گەڕانەوەی دەیان هەزار لەو ئێزیدیانەی بەهۆی نەبوونی سەقامگیری و نەبوونی پرۆژە خزمەتگوازرییەکانەوە ناتوانن بگەڕێنەوە، هەروەک چۆن بەشێکی زۆری ئێزیدییەکانیش ترسی ئەوەیان هەیە حکومەت توانای کۆنترۆڵکردنی دۆخی و ئەمنی و جڵەوکردنی میلیشیاکانی نەبێت .

رۆژی ٩ی ئەم مانگە حکومەتی هەرێمی کوردستان و حکومەتی فیدراڵی ڕێککەوتنێکیان راگەیاند بەمەبەستى ئاساییکردنەوەی بارودۆخی شنگال، کەبەپێی ئەوە بەرپرسیارێتی ئەمنیی شارەکە بە پۆلیسی فیدراڵی دەسپێردرێت و سەرجەم گرووپە چەکدارییەکان لە شارەکە دەچنە دەرەوە و ڕێگەش بۆ گەڕانەوەی ئاوارە ئیزیدییەکان بۆسەر جێگا و ڕێگای خۆیان خۆشدەکرێت.

وەرگێران  : ئاکۆ ئاڵی