بۆ یەکەمجار کۆنفرانسی نێودەوڵەتی هەورامان لەزانکۆیەکى ئێران بەڕێوەدەچێت

کوردستان

18/07/2022‌ 263 جار خوێندراوه‌ته‌وه

شارپرێس:
لە دوو رۆژی ڕابردوودا و بە بەشداری دەیان توێژینەوەی نێودەوڵەتی و ئامادەبوونی بەرپرسانی باڵای ئیران و سەدان توێژەر و ئەکادیمیست و مامۆستایانی زانکۆ لە زانکۆی رازی کرماشان لە کۆماری ئیسلامی ئێران، بۆ یەکەمین جار کۆنفرانسی نێودەوڵەتی هەورامان بەڕێوەچوو.

‏‎کۆنفرانسەکە بە دروشمی (کەلەپووری جیهانیی هەورامان و گەشەپێدانی بەردەوام- گرنگی تۆماری جیهانیی هەورامان لە لایەن رێکخراوی یۆنسکۆوە) ئەنجامدراو لە رۆژی یەکەمی کۆنفرانسەکەدا و لە مەراسیمی کردنەوەیدا وەزیری رۆشنبیری ئێران و پارێزگاری کرماشان و نوێنەری هەورامان لە پەرلەمانی ئێران و ژمارەیەک لە بەرپرسانیتری ئێران وتەیان پێشکەش کرد و جەختیان لەسەر گرنگی بایەخدانی فراوانتری حکومەت بە هەورامان کردەوە.

هاوکات عەباس غەزالی ئەندامی پێشووی پەرلەمانی کوردستان بە ناوی چڤاکی رۆشنبیریی هەرێمی کوردستانەوە وتارێکی پێشکەش کرد و جەختی لەسەر گرنگیپێدانی حکومەتی هەرێمی کوردستان بە هەورامان کردەوە و ئاماژەی بەوەشکرد کە «پێویستە هەوڵی فراونکردنی کاری هاوبەشی نێوان رۆشنبیران و توێژەران بدرێت بۆ ئەوە باشتر بەسەر ئاڵەنگارییە کلتورییەکاندا سەرکەوتوو بین.»

لە پانێڵێ یەکەمی کۆنفرانسەکەشدا هەریەک لە (د. حەسەن دانایی فەڕ) باڵوێزی پێشووی ئێران لە عێراق، (د. موئمین زەڵمی) مامۆستای زانکۆ و رۆشنبیری هەرێمی کوردستان و (د. محەمەدرەزا مەجیدی) نوێنەری کۆماری ئیسلامی ئێران لە یۆنسکۆ وتاریان پێشکەش کرد.

لای خۆیەوە د. موئمین زەڵمی مامۆستای زانکۆ وتى: هەورامان دەتوانێت لە چەند گۆشە نیگای جیاوازەوە ببێتە ئەڵقەی بەهێزکردنی پەیوەندی دیپلۆماسی نێوان هەرێمی کوردستان و کۆماری ئیسلامی ئێران.

ئاماژەی بەوەشکرد «گرنگە بەرپرسانی هەورامیی لە هەرێمی کوردستان و کۆماری ئیسلامی ئێران پەیوەندی نزیکتریان هەبێت لە پێناو باشترکردنی پەیوەندی دوو حکومەت، هەروەک سود لە لایەنی گەشتیاری هەورامان وربگیردرێت (گەشتیاری دیپلۆماسی) بۆ بەهێزکردنی پەیوەندییەکان و پێگەی هەورامان و دۆخی عەدالەتی کۆمەڵایەتی و ئەوەی کە لە ناوچەی هەورامان کەمترین توندوتیژی بەرامبەر بە ژنان هەیە دەکرێت ببێتە ئولگوویەکی سەرکەوتوو بۆ باشترکردنی دۆخی کۆمەڵایەتی لە ناوچەکەدا و هەردوو وڵاتی عێراق و ئێران دەتوانن سود لە ئەزموونی کۆمەڵایەتی و سیاسی هەورامان وربگرن».

لە رۆژی دووەمی کۆنفرانسەکەشدا ژمارەیەک توێژەری زانکۆکانی ئێران و سلێمانی و هەولێر توێژینەوەکانیان لەسەر تەوەرە جیاوازەکانی کۆنفرانسەکە پێشکەش کرد.

هەورامان ناوچەیەکی فراوانی سەر سەوزی کوێستانییە لەسەر سنوری هەرێمی کوردستان و کۆماری ئیسلامی ئێران و ژمارەی دانیشتوانەکەی بە نزیکەی ٧٠٠،٠٠٠ هەزار کەس هەژمار دەکرێت کە نزیکەی ٦٠٠ گوند و شار و شارۆچکەی دەکەوێتە سنوری ئێران و ٢٣ گوند و ناحیە و شارۆچکەی دەکەوێت سنوری هەرێمی کوردستانی عێراقەوە.