شارپرێس:

ژه‌نراڵ مەزڵوم عەبدی فەرماندەی گشتیی هێزه‌كانى سوریاى دیموكرات (هەسەدە) له‌کۆنفرانسی ئاسایشی میونشن-ه‌وه‌ په‌یامێكى بڵاوكرده‌وه‌و ڕایگه‌یاند، "دەمانەوێت لەڕۆژئاوای کوردستان مەرجەعیەتێکی کوردی هەبێت بۆ بڕیاردان"، چاودێرانیش ده‌ڵێن، "لێدوانەکەی مەزڵوم عەبدی، دەربارەی دروستکردنی مەرجەعیەتێکی کوردی بۆ بڕیار، ئاماژەیە بۆ قۆناغێکی نوێ لەستراتیژیی سیاسیی ڕۆژئاوای کوردستان‌و ئەو هەنگاوەش وەک وەڵامێکە بۆ فشارە دەرەکییەکان‌و هەوڵێکە بۆ شەرعیەتدان بەبڕیارە چارەنوسسازەکان لەڕێگەی کۆدەنگیی نیشتمانییەوە".

لەکاتێکدا سوریا بەرەو گۆڕانکاریی سیاسیی دەڕوات، کورد لەو وڵاتەدا پێویستی بەگوتارێکی یەکگرتوو هەیە، مەرجەعیەتی سیاسی تەنها ڕێککەوتنی نێوان حزبەکان نییە، بەڵکو دروستکردنی چەترێکی شەرعیە کە بتوانێت لەبەردەم دیمەشق‌و ئەنكەرەو کۆمەڵگەی نێودەوڵەتیدا نوێنەرایەتی ڕاستەقینەی کورد بکات.

یەکخستنی بڕیاری سیاسیی: کۆتاییهێنان بەپەرتەوازەیی لەنێوان لایەنەکان (بەتایبەت نزیکبونەوەی تەڤ-دەم‌و ئەنەکەسە).
بەهێزکردنی پێگەی دانوستان: کاتێک کورد بەیەک مەرجەعیەتەوە بچێتەسەر مێزی گفتوگۆ لەگەڵ حکومەتی سوریا، دەستکەوتی زیاتر به‌ده‌ستده‌هێنێت‌و دەشیانپارێزێت.
شەرعیەتی نێودەوڵەتی: هاوپەیمانان (بەتایبەت ئەمریکا) داوای لایەنێکی یەکگرتوو دەکەن کە هەموو پێکهاتە سیاسییەکانی تێدابێت.

شرۆڤه‌كارانیش له‌باره‌ى په‌یامه‌كه‌ى عه‌بدیه‌وه‌ پێیانوایه‌، دروستکردنی ئەو مەرجەعیەتەى ژه‌نراڵه‌كه‌ى كورد باسیكردوه‌، بێ کێشە نییه‌و ناشبێت، چونكه‌:
دەستێوەردانی هەرێمی: فشارەکانی تورکیا بۆ ڕێگریی لەهەر جۆرە قەوارەیەکی یەکگرتوی کوردی.
ململانێی ناوخۆیی: مێژوی ناکۆکییەکانی نێوان جەمسەرە سیاسییە کوردییەکان‌و جیاوازیی ئایدیۆلۆژیی.
پەیوەندی لەگەڵ ئۆپۆزسیۆنی سوریا: چۆنیەتی هاوسەنگکردنی مەرجەعیەتی کوردی لەگەڵ چوارچێوەی گشتیی سوریادا.

هه‌روه‌ك چاودێرانى سیاسیى ئاماژه‌ به‌وه‌ده‌كه‌ن، لێدوانەکەی مه‌زڵوم عەبدی نیشانەی تێگەیشتنە لەوەی کە "هێزی سەربازیی بەتەنها بەس نییە بۆ پاراستنی دەستکەوتەکان"، بەڵکو پێویستە پشتگیرییەکی سیاسیی یەکگرتوی لەپشت بێت بۆ ئه‌وه‌ش، دیالۆگی بێ مەرج‌و دەستپێکردنەوەی گفتوگۆی جیدی لەگەڵ هەموو لایەنە سیاسییەکان بێ دورخستنەوە یه‌كێك له‌پێویستیه‌كانه‌.

هاوكات ڕۆڵی هەرێمى کوردستانیش به‌گرنگ ده‌زانرێت، چونكه‌ سودوەرگرتن لەئەزمونی هەرێم وەک نێوەندگیرێکی کارا بۆ لێکنزیککردنەوەی لایەنەکان، وەک لەکۆبونەوەکانی مەزڵوم عەبدی لەگەڵ سەرکردایەتی هەرێمدا ڕەنگیداوەتەوە، له‌گه‌ڵ جیاکردنەوەی هێزى سەربازیی لەهێزى سیاسی، ئه‌ویش ڕێگەدانه‌ بەمەرجەعیەتە سیاسییەکە کە بڕیارە مەدەنی‌و دیپلۆماسییەکان بدات بەسەربەخۆیی.

په‌یامه‌كه‌ى مه‌زڵوم عه‌بدى له‌كاتێكدایه‌، ناوه‌ڕاستى مانگى ڕابردوو له‌دیدارێكى ته‌له‌فزیۆنیدا كاتێك پرسیارى لێكرا ئاخۆ چ پۆستێك له‌حكومه‌تى سوریا وه‌رده‌گرێت، ژه‌نراڵه‌كه‌ى كوردان له‌وه‌ڵامدا جه‌ختیكرده‌وه‌ له‌سه‌رئه‌وه‌ى، هیچ پۆستێك له‌سوریا وه‌رناگرێت‌و خۆى ته‌رخانده‌كات‌و بۆ لێكنزیككردنه‌وه‌ى لایه‌نه‌ كوردیه‌كان‌و دروستكردنى كۆده‌نگى، بۆ ئه‌وه‌ى بتوانێت، ئه‌و خه‌ونه‌ى ساڵه‌هاى ساڵه‌ كارى بۆ ده‌كات بیگه‌یه‌نێته‌ كه‌نارى ئارام.