شارپرێس:

لەکاتێکدا ناوچەکە لەبەردەم گۆڕانکاریی جەوهەریی‌و چارەنوسسازدایە، هەردوو حزبی شیوعی‌و کۆمەڵە بەدوو ڕاگەیەندراوی هاوکات، بێدەنگیی سیاسیی دەشکێنن‌و بەچەکوشی (یەکڕیزیی نەتەوەیی)‌و (خەباتی چینایەتی)، پشتگیریی خۆیان بۆ پڕۆژەی کۆدەنگیی نیشتمانی ڕادەگەیەنن، ئەمە تەنها واژۆیەک نییە، بەڵکو نەخشەڕێگەیەکی نوێیە بۆ هەژاندنی ناوەندەکانی بڕیار لەجیهان‌و گۆڕینی هاوکێشەکان لەبەرژەوەندیی گەلی کوردستان.

لەوەرچەرخانێکی سیاسیی نوێدا لەسەر ئاستی هەر چوار پارچەی کوردستان، هەردوو حزبی شیوعیی کوردستان‌و کۆمەڵە (ڕێکخراوی کوردستانی حزبی کۆمۆنیستی ئێران) بەفەرمی پشتگیریی خۆیان بۆ "پڕۆژەی کۆدەنگیی نیشتمانی"و دامەزراندنی "ناوەندی دیالۆگی نەتەوەیی" ڕاگەیاند کە لەلایەن زیاتر لە200 کەسایەتیی سیاسیی‌و ڕۆشنبیرییەوە دەستیپێکردوە.

حزبی شیوعی: یەکڕیزیی بنەمای پاراستنی مافەکانە
مەکتەبی سیاسیی حزبی شیوعیی کوردستان لەڕاگەیەندراوێكدا جەختدەکاتەوە، لەم قۆناغەدا تەنها "گوتاری یەکگرتوی کوردستانی" دەتوانێت ناوەندەکانی بڕیار لەجیهاندا بهەژێنێت.

حزبى شیوعى ئاماژەى به‌وه‌شداوه‌، پێویستە هەموو جۆرە دوبەرەکی‌و گوتارێکی ڕق‌و کینە بەلاوە بنرێت، چونکە یەکڕیزیی نەک تەنها بۆ تێپەڕاندنی قەیرانەکان، بەڵکو بۆ تەواوکردنی قۆناغی ڕزگاریی نیشتمانی ئەرکێکی مێژوییە لەسەر شانی هەموان.

کۆمەڵە: دیالۆگ لەخزمەت چینە بێبەشەکاندا
لەلایەکی دیكه‌وه‌، کۆمیتەی ناوەندیی کۆمەڵە وێڕای پێشوازیکردن لەدەسپێشخەریەكه‌، ڕوانگەیەکی "چینایەتی‌و ستراتیژیی" دەخاتە ڕوو، پێیوایە "هەرچەندە بارودۆخی پارچەکان جیاوازە، بەڵام چارەنوسیان بەیەکەوە بەستراوەتەوە".

کۆمەڵە مەرجی سەرکەوتنی ئەو پڕۆژەیە دەبەستێتەوە بە"شەفافییەتی سیاسیی"‌و ئەوەی کە دەبێت ئەم دیالۆگە ببێتە هۆی بەهێزکردنی خەباتی ڕاستەقینەی "کرێکاران، زەحمەتکێشان، ژنان‌و گەنجان"، نەک تەنها لەئاستی گفتوگۆی سیاسیی سەرەوەدا بمێنێتەوە.

خاڵە هاوبەشەکانی هەردوو ڕاگەیەندراوەکەى حزبى شیوعى‌و كۆمه‌ڵه‌ له‌چه‌ند پرسێكدا خۆیان ده‌بیننه‌وه‌ كه‌ بریتین له‌"پشتگیریی ڕەها بۆ بانگەوازی ئەو 200 کەسایەتییەی پڕۆژەکەیان ڕاگەیاندوە، هاوكات دیالۆگ وەک تاکەڕێگە بۆ ڕوبەڕوبونەوەی گۆڕانکارییە خێراکانی ناوچەکە، پاراستنی سەربەخۆیی هێزە سیاسییەکان لەچوارچێوەی کارێکی هاوبەشی نەتەوەییدا".

ئەم هەڵوێستە هاوكاتانەی ئەم دوو هێزە چەپەكه‌ لەمڕۆدا، ئاماژەیەکی ڕونە بۆ دروستبونی فشارێکی جەماوەریی‌و سیاسیی بۆسەر لایەنەکانی دیكه‌، تاوەکو بێنە ناو بازنەی ئەم کۆدەنگییە نیشتمانییەوە بۆ پاراستنی دەستکەوتەکانی گەلی کوردستان.

هه‌ڵوێسته‌كه‌ى حزبى شیوعى‌و کۆمەڵە (ڕێکخراوی کوردستانی حزبی کۆمۆنیستی ئێران) له‌به‌رامبه‌ر پڕۆژه‌ى كۆده‌نگى نیشتمانى له‌كاتێكدایه‌، پێشتر كۆنسه‌ى به‌ڕێوه‌به‌رى كه‌جه‌كه‌و دواتریش حزبى زه‌حمه‌تكێشانى كوردستان‌و ڕه‌وتى هه‌ڵوێستى نیشتمانى‌و كۆنگره‌ى نه‌ته‌وه‌یى كوردستان (كه‌نه‌كه‌) په‌یوه‌ستبونى خۆیان به‌پڕۆژه‌كه‌وه‌ ڕاگه‌یاندبوو، ئه‌مڕۆش كۆمه‌ڵه‌ى شۆڕشگێڕى زه‌حمه‌تكێشانى كوردستانى ئێران‌و بزوتنەوەی دیموکراتی گەلی کوردستان به‌هه‌مانشێوه‌ جگه‌ له‌پتشیوانى، په‌یوه‌ستبونى خۆیان به‌و پڕۆژه‌ نیشتمانییه‌وه‌ ڕاگه‌یاند.

چاودێرانى سیاسیى پێیانوایه‌، ئەو دوو ڕاگەیەندراوەی حزبی شیوعی‌و کۆمەڵە، تەنها دەربڕینی هەڵوێستێکی سیاسی نین، بەڵکو زەنگێکی هۆشیارکەرەوەن بۆ هەموو هێزە کوردستانییەکان؛ کە کاتی ئەوەهاتوە بەرژەوەندییە تەسکە حزبییەکان‌و گوتاری ڕق‌و کینە لەپێناو ئامانجە گەورەکاندا تێپەڕێنرێن، کاتێکیش دوو جەمسەری چەپ‌و نیشتمانی لەسەر بنەمای دیالۆگی نەتەوەیی‌و پشتبەستن بەجەماوەر کۆکدەبن، ئەوە پەیامێکی ڕونە کە چیتر پەرتەوازەیی بژاردەی گەلی کوردستان نییە، ئێستاش تۆپەکە لەمەیدانی ناوەندەکانی بڕیاردایە، ئایا دەتوانن ئەم هەلە مێژوییە بقۆزنەوەو کوردستان لەبەردەم گۆڕانکارییە چاوەڕوانکراوەکانی ناوچەکەدا بکەنە یەک پارسەنگی بەهێز؟ یان مێژوو جارێکی دیكه‌ بەحەسرەتی یەکڕیزییەوە دەنوسرێتەوە؟.