شارپرێس:
بەپێی ڕاپۆرتێکی نوێی تۆڕی فۆکس نیوز، فڕینی فڕۆکەی مووشەکهاوێژە زەبەلاحەکانی جۆری (B-52)ی ئەمریکی لە ئاسمانی ئێراندا ئاماژەیەکی ڕوونە بۆ وەرچەرخانێکی گرنگ لە هاوکێشە سەربازییەکان و نیشاندانی باڵادەستیی ئاسمانیی ڕەهای ئەمریکایە.

 
 ئەم پێشهاتە دوای چەند هەفتەیەک لە هێرشە چڕەکانی سەر سیستەمە بەرگرییەکانی ئێران دێت، کە وادیارە توانای بەرپەرچدانەوەی ئەو وڵاتەیان تا ئاستێکی زۆر لاواز کردووە. ئەم فڕۆکانە کە تەمەنی خزمەتکردنیان دەگاتە نزیکەی 70 ساڵ، وەک ئامرازێکی کاریگەر بۆ زیادکردنی چڕی و وردیی هێرشەکان بەکاردێن و دەتوانن بۆ ماوەیەکی درێژ لە ئاسمانی ناوچەی شەڕدا بمێننەوە.

بە گوتەی مارک گونزاینگەر، فەرماندەی پێشووی ئەم جۆرە فڕۆکانە، تایبەتمەندیی سەرەکی (B-52) لەوەدایە کە دەتوانێت لە یەک کاتدا چەندین ئامانجی جێگیر و گۆڕاو و تەنانەت بنکە کۆنکرێتییە قایمەکانیش بپێکێت.

 ئەمەش نیشانەی ئەوەیە کە سوپای ئەمریکا قۆناغی تێکشکاندنی بەرگرییە ئاسمانییەکانی تێپەڕاندووە و ئێستا دەتوانێت بە ئازادی لە ناو جەرگەی ئاسمانی ئێراندا ئۆپەراسیۆن ئەنجام بدات. ئەم فڕۆکەیە توانای هەڵگرتنی 70,000 پاوەند تەقەمەنی جۆراوجۆری هەیە، لە بۆمبی زیرەکەوە تا مووشەکی دوورمەودا. 

هەرچەندە ئەم فڕۆکەیە خاوە و تەکنەلۆژیای خۆدزینەوە لە ڕاداری نییە، بەڵام بەکارهێنانی لەم کاتەدا دەری دەخات کە ئاسمانی ئێران چیتر مەترسییەکی ئەوتۆی بۆ سەر فڕۆکە ئەمریکییەکان تێدا نەماوە.

سەرەڕای ئەم باڵادەستییە، بەرپرسانی ئەمریکا هۆشداری دەدەن کە هێشتا هەڕەشەکان کۆتایییان نەهاتووە، چونکە ئێران پەنا بۆ تاکتیکی ناڕێکخراو و بەکارهێنانی درۆن و مووشەک دەبات.

لەکاتێکدا لە هێرشەکانی حوزەیرانی 2025 بۆ سەر دامەزراوە ئەتۆمییەکانی وەک فۆردۆ و نەتەنز فڕۆکەی (B-2)ی پێشکەوتوو بەکارھێنران، ئێستا جێگیرکردنی (B-52) نیشانەی ئامادەکارییە بۆ قۆناغێکی سەختتر و بەردەوامتر لەو ململانێیە.