شارپرێس:
سەرچاوە ئاگادارەکانی ئێران ڕۆژی یەکشەممە بە کەناڵی سی ئێن ئێنیان ڕاگەیاندووە کە شاندێکی تاران ڕۆژی سێشەممە بە مەبەستی وتووێژ لەگەڵ بەرپرسانی ئەمریکا دەچێتە پاکستان لە هەوڵێکدا بۆ زیندووکردنەوەی دانوستانە وەستاوەکانی نێوان واشنتۆن و تاران.
سەرچاوەکان پێشبینی دەکەن شاندەکەی ئێران هەمان ئەو تیمە لەخۆ بگرێت کە لە دوایین خولی دانوستانەکاندا بەشدارییان کردبوو، بە سەرۆکایەتی عەباس عەراقچی وەزیری دەرەوە و محەمەد باقر قالیباف سەرۆکی پەرلەمان.
دەشڵێن، لایەنی ئێرانی پێشبینی بەیاننامەیەکی هاوبەشی ڕەمزی دەکات لە ڕۆژی چوارشەممەدا.
سەرچاوەکان ئاماژەیان بەوە کردووە کە ئەگەر پێشکەوتن بەدی بهێنرێت و دۆناڵد ترەمپ، سەرۆکی ئەمریکا ڕازی بێت بە سەفەرکردن بۆ ئیسلام ئاباد، ئەوا سەرۆک کۆماری ئێرانیش بە هەمان شێوە دەچێت و کۆبوونەوەیەکی هاوبەشی سەرۆکایەتی بۆ واژۆکردنی ئەو ڕێککەوتنەی بە "جاڕنامەی ئیسلام ئاباد" ناسراوە، ئەنجام دەدرێت.
تا ئێستا هیچ پشتڕاستکردنەوەیەکی فەرمی لە تارانەوە نەدراوە کە دانوستانکارانی ئەو وڵاتە گەشت بکەن بۆ ئیسلام ئاباد.