شارپرێس:

لەوەڵامێکی توندو ڕاشکاودا بۆ ئەو دەنگۆیانەی لەبارەی پڕچەککردنی حزبەکانی ڕۆژهەڵاتی کوردستان بڵاوکراونەتەوە، ڕەزا کەعبی سکرتێری کۆمەڵەی زەحمەتکێشانی کوردستان، پەردە لەسەر ڕاستییەکان لادەبات‌و جەخت لەسەر سەربەخۆیی خەباتی چەکداریی‌و سیاسییان دەکاتەوە، ده‌شڵێت، "نه‌ چه‌كمان له‌ئه‌مریكاو هیچ وڵاتێكى دیكه‌ وه‌رگرتوه‌و نه‌ ده‌ستبه‌ردارى خه‌باتیشمان ده‌بین".

ڕەتکردنەوەی دەنگۆکانی ترەمپ‌و هاوکارییە دەرەکییەکان
ڕەزا کەعبی بەتوندی ئەو هەواڵانەی ڕەتکردەوە کە باس لەوەرگرتنی چەک لەئەمریکا، ئیسرائیل یان وڵاتانی کەنداو دەکەن، ئەو ڕاشیگەیاند، "ئەم قسانە هیچ بنەمایەکیان نییەو هێندە بێبایەخن پێویستیان بەبەدرۆخستنەوەش نەبوو".

ئەو جەختیکردەوە، هیچ حزبێکی ناو "هاوپەیمانیی حزبەکانی ڕۆژهەڵات" هیچ جۆرە کۆمەکێکی سەربازیی لەو دەوڵەتانە وەرنەگرتوە.

47 ساڵ خەبات بەبێ پشتیوانی دەرەکی
کەعبی ئاماژەی بەوەکرد، بزوتنەوەی کوردى لەڕۆژهەڵات، 47 ساڵە بەتەنها بەرەنگاری ستەمی کۆماری ئیسلامی بوەتەوە، ئەو وتی، "نە ئەمریکی، نە ئیسرائیلی و نەعەرەبەکانیش لەم نیو سەدەیەدا بەهانامانەوە نەهاتون؛ ئێمە تەنها پشتئەستورین بەجەماوەری خۆمان‌و درێژەپێدەری شۆڕشی (ژن، ژیان، ئازادی)ین."

پاراستنی قەوارەی هەرێم وەک هێڵی سور
یەکێک لەخاڵە هەرە گرنگەکانی لێدوانەکەی کەعبی، ڕەچاوکردنی بەرژەوەندییەکانی باشوری کوردستان بوو، جه‌ختیكرده‌وه‌، "ئێمە لەهەڵوێستی حکومەت‌و خەڵکی هەرێمی کوردستان ڕازین‌و هەمیشە هەوڵمانداوە دۆخی هەستیاری هەرێم ڕەچاوبکەین بۆ ئەوەی نەبینە هۆی دروستبونی گرفت بۆیان".

ڕه‌زا كه‌عبى له‌و لێدوانه‌یدا، هەرێمی کوردستانی وەک پشتیوانی سەرەکی هەموو پارچەکانی دیكه‌ى کوردستان وەسفکرد.

دۆخی ناوخۆی ئێران.. حکومەت تەنها پاسدارە
سەبارەت بەدۆخی ناوخۆی ئێران، کەعبی پێیوایە کۆماری ئیسلامی لەهەموو کاتێک لاوازترەو ڕاشیگەیاند، "شتێک بەناوی دەسەڵات نەماوە، تەنها دەیان هەزار پاسدارن کە کۆمەڵگەیان بەبارمتە گرتوە".

ئه‌وه‌شى وت، "تاران بەهۆی ترس لەپێگەی جەماوەریی حزبەکانی ڕۆژهەڵات، پەنا بۆ تیرۆرو هێرشدەبات، بەڵام ئەمە ورەی ئەوان ناشکێنێت".

پەیامی ڕەزا کەعبی ڕونبوو، وه‌كو وتى، "خەباتی ڕۆژهەڵات خەباتێکی ڕەسەن‌و جەماوەرییە، نە دەبێتە داردەستی وڵاتان‌و نە دەبێتە مەترسی بۆ سەر قەوارەی هەرێمی کوردستان، بەڵکو ئامانجی سەرەکی ڕزگاریی نەتەوەیی‌و گەیشتنە بەئازادی".