عمیحای شیکلی، وەزیری کاروباری رەوەندی ئیسرائیلی، داوای داخستنی دەستبەجێی کونسوڵخانەی تورکیای لە قودس کرد، ئەمەش دوای توێژینەوەیەکی نوێی ناوەندی قودس بۆ سیاسەتە پراکتیکییەکان (JCAP) کە بانگەشەی ئەوە دەکات ئەنقەرە ستراتیژییەکی درێژخایەن بۆ فراوانکردنی هەژموونی لە قودس و ناوچەکەدا جێبەجێ دەکات.
توێژینەوەکە ڕوانگەی ڕەجەب تەیب ئەردۆغان دەخاتە ڕوو کە قودس وەک ئامانجێکی ستراتیژیی ناوەندی دەبینێت. بەپێی توێژینەوەکە، تورکیا لە چەندین بەرەدا کار دەکات؛ لەوانە چالاکییەکانی لە قودس لە ڕێگەی دامەزراوە ڕۆشنبیرییەکان، کۆمەڵگەکان، خوێندن و هاوکاریی ئابووری، بەهێزکردنی پەیوەندییەکانی لەگەڵ حەماس و غەززە، بەشداریی سەربازی لە باکووری سوریا و دەستوەردان لە لوبنان.
هەروەک ئاماژە بەوە کراوە کە ئەنقەرە ڕێگە بە بەرپرسانی حەماس دەدات لە خاکەکەیەوە بە هەماهەنگیی لەگەڵ هەواڵگریی تورکیا (MIT) کار بکەن، و کونسوڵخانەی تورکیا لە قودس وەک ناوەندێک بۆ جێبەجێکردنی ئەم سیاسەتانە بەکاردێنێت.
لە سەر بنەمای ئەم ئەنجامانە، شیکلی داوای کردووە کونسوڵخانەی تورکیا لە قودس دابخرێت و تەواوی نوێنەرایەتییەکانی حکومەتی تورکیا، بە کەناڵە تەلەڤزیۆنییە دەوڵەتییەکانیشیەوە دەربکرێن، بەو پێیەی هیچ شوێنێک نییە بۆ بەردەوامبوونی چالاکیی دەستەیەکی دیپلۆماسی کە دژی سەروەریی ئیسرائیل کار بکات و بەرژەوەندییەکانی حەماس بپارێزێت.



ئاکۆ عەبدوڵڵا ئاڵی