شارپرێس:

دەستەی ناوچە کوردستانییەکانی دەرەوەی ئیدارەی هەرێم وەڵامی محەمەد سەمعان، پارێزگاری کەرکوکی دایەوە و ڕایگەیاند، لێدوانی نادەستورییانەی ناوبراو ڕەتدەکەینەوە و پێویستە خۆی بەدوربگرێت لەو دەستەواژانەی کە پێچەوانەی دەستورن.

دەستەی ناوچە کوردستانییەکانی دەرەوەی ئیدارەی هەرێم لەراگەیەنراوێکدا ئاماژەی بەوەکرد،" هەر جۆرە لێدوانێکی نادەستوری لەلایەن پارێزگاری کەرکوکەوە کە پێچەوانەی دەستوربێت، جگە لەوەی ڕەتیدەکەینەوە و بە پێویستیشی دەزانین لەم قۆناخە هەستیارەدا  جەنابی پارێزگار گیانی پێکەوەژیانی ڕاستەقینە لە شارەکە زاڵبکات و خۆی بە دور بگرێت لە بەکارهێنانی دەستەواژەیەک کە پێچەوانەی دەستور و ئیرادەی ڕاستەقینەی گەلانی عێراق بێت  ".

ئەوەشیخستەڕوو، پابەندبون بە دەستوری عێراق تەنیا پابەندییەکی یاسایی و دەستگرتن نییە بەو دەسکەوتانەی کە بەدیهاتون، بەڵکو ڕێزگرتنە لە ئیرادەی گەلانی عێراق، خەڵکی کوردستانیش وەک پێکهاتەیەکی گرنگی ئەم وڵاتە بە بایەخێکی زۆرەوە وێڕای تێبینییەکانی دەستی بەم بنەما بنچینەیەوە گرتوە، وەک بەری خەباتێکی دور و درێژ وێنای دەکات ".

دەستەی ناوچە کوردستانییەکان باسی لەوەشکرد،" مادەی 140ـی دەستوریش وەک دیارترین نەخشەڕێگە، ڕۆڵی خۆی بینیوە بۆ چارەسەرکردنی کێشەیەکی دێرینی نیشتیمانەکەی، ئەویش پرسی ناسنامەی ڕوبەرێکی بەرفراوانی خاکەکەیەتی لە عێراقدا، پێمانوایە دەستور ڕێگەیەکی هاوسەنگی بۆ داڕشتوین بە ئاراستەی چارەسەرکردنی ئەم پرسە لە چوارچێوەی عێراقی فیدراڵدا".

ئەمەش لە کاتێکدایە، لە شەوی 4ـی ئاب، محەمەد سەمعان، پارێزگاری کەرکوک لە چاوپێکەوتنێکدا لەگەڵ کەناڵی فەرمیی حکومەتی عێراق ڕایگەیاند، گەورەترین هەڵەی ستراتیژی کە دەوڵەتی عێراقی لەدوای ساڵی 2003 بەرامبەر بە کەرکوک کردویەتی، مادەی 140 بوە .