شارپرێس:

بەڕێوەبەرایەتی نەوت و کانزاکانی هەولێر جێهێشتنی ئۆتۆمبێلی لەپێش بەنزینخانە و لەناوکۆڵانەکان قەدەغەکرد و دەڵێت، هەر شۆفێرێک سەرپێچی بکات سزادەدرێت.

بەڕێوەبەڕایەتیی نەوت و کانزاکانی هەولێر لەئاگادارییەکدا ئاماژەی بەوەکرد،" ڕاگرتنی ئۆتۆمبێل لە پێش بەنزینخانە، لەسەر شەقام و ناو کۆڵانەکان بۆ نۆرەگرتنی بەنزین ڕۆژێک پێش دابەشکردن (بەتایبەتی لە کاتی شەواندا) بە هەموو شێوەیەک قەدەغەیە ".

ئەوەشیخستەڕوو، هەر شۆفێرێک سەرپێچی بکات،  ژمارەی ئۆتۆمبێلەکەی لەلایەن بەڕێوەبەڕایەتیی هاتوچۆوە تۆمار دەکرێت و سزای پێبژاردنی بۆ دەنوسرێت.

بەڕێوەبەرایەتی نەوت و کانزاکانی هەولێر داوا لە هاوڵاتیان و شۆفێران دەکات بە هیچ شێوەیەک ئۆتۆمبێل بۆ نۆرەگرتن لە شەقام و کۆڵانەکاندا ڕانەگرن و بەجێی نەهێڵن.