شارپرێس:
عاسمی مونیر، فەرماندەی سوپای پاکستان کە وڵاتەکەی ناوبژیوانیی لە نێوان ئێران و ئەمریکا دەکات، ئەمرۆ سێشەممە گەیشتە تاران، لە کاتێکدا پرۆسەی دیپلۆماسی لە نێوان تاران و واشنتۆن بەهۆی سووربوونی هەردوولا لەسەر هەڵویستەکانیان تووشی بنبەست بۆتەوە، بە تایبەتی لەبارەی کردنەوەی گەرووی ستراتیژیی هورمز.

 
لەماوەی رابردوودا پاکستان ڕۆڵێکی چالاکی لە ئامادەکردنی یادداشتی لێکتێگەیشتن لە نێوان هەردوو وڵاتدا گێڕا، کە لە ناوەڕاستی حوزەیرانی ڕابردوودا واژۆ کرا، بەڵام بە زوویی هەڵوەشایەوە و کاری پێنەکرا.

سەرەڕای وەستانی هێرشە سەربازییەکانی ئەمریکا بۆ سەر ئێران لە سەرەتای ئەیلوولەوە، مەترسیی دەستپێکردنەوەی شەڕ هێشتا کاریگەری لەسەر ژیانی ڕۆژانەی ئێرانییەکان هەیە. ئیسماعیل بەقایی، وتەبێژی وەزارەتی دەرەوەی ئێران، ئەمرۆ سێشەممە وتی: "شەو و ڕۆژ لەگەڵ ئەم ئەگەرەدا دەژین و ناتوانین ڕەتی بکەینەوە، تەنانەت لەو ساتەی ئێستا قسە دەکەین."

سەردانی مونیر دوای سەردانی سێرگێ لاڤرۆڤ، وەزیری دەرەوەی ڕووسیا، بۆ تاران لە دووشەممەدا دێت؛ لە کاتێکدا مۆسکیش هەوڵ دەدات خۆی وەک ناوبژیوانێکی گریمانکراو لەو ناکۆکییەدا بناسێنێت.

ئەمە پێنجەمین سەردانی مونیرە بۆ ئێران لە دوای ئاگربەستەکەوە. لە سەردانی پێشوودا لەگەڵ مەسعوود پزیشکیان، سەرۆکی ئێران، و چەند بەرپرسی باڵای دیکە، لەوانە موحسن ڕەزایی، محەممەد باقر قالیباف و عەباس عێراقچی، کۆبۆتەوە.

یەکشەممەش عێراقچی و محەممەد ئیسحاق دار، هاوتاکەی لە پاکستان، تەلەفۆنیان کرد و دوا پەرەسەندنە ناوچەییەکانیان تاوتوێ کرد، بە تایبەتی هەوڵە دیپلۆماسییەکان بۆ کەمکردنەوەی گرژییەکان و بەدیهێنانی سەقامگیریی لە ناوچەکەدا.

وتەبێژی سوپای پاکستان دووشەممە جەختی کردەوە کە وڵاتەکەی بەردەوامە لە هەوڵەکانی بۆ کەمکردنەوەی گرژییەکان و پاراستنی کەناڵەکانی پەیوەندی لەگەڵ هەموو لایەنە ناوچەییەکان، لەوانە ئێران.

ناوبراو جەختی کردەوە کە فراوانبوونی ڕووبەری پێکدادانە سەربازییەکان لە ڕۆژهەڵاتی ناوەڕاستدا سوودی بۆ هیچ لایەنێک نییە و چارەسەر تەنها لە ڕێگای دیپلۆماسی و گفتوگۆدایە.