شارپرێس:
رۆژنامەی "ئۆراسیا دەیلی" لەژێر ئەو ناونیشانەی سەرەوە بابەتێكی نووسیوە لەسەر دەركەوتنی ئاسۆی لێكترازان لەناو ڕیزەكانی پارتی داد و گەشەپێدانی دەسەڵاتداردا .
بەپێی رۆژنامەكە، ئەحمەد داود ئۆغڵو سەرۆك وەزیری پیشووی توركیا و كەسی نزیكی رەجەب تەیب ئەردۆغانی سەرۆك كۆماری توركیا زۆر بەتوندی رەخنەی لە سیاسەتەكانی ئێستای پارتی داد و گەشەپێدانی دەسەڵاتدار گرت ، ئەوەش یەكەم لێدوانی ئاشكرایەتی لەدوای دەستلەكاركێشانەوەی لەساڵی ٢٠١٦ .
داودئۆغڵو رەخنەشی لە سیاسەتە ئابوورییەكانی حكوومەت و ئەو كۆتوبەندانەش گرت كە خستوویەتییە سەر كاری میدیا و رۆژنامەگەری ، گوتیشی كە سیاسەتەكانی حزبی دەسەڵاتدار زیانی بە پرەنسیپی جیاكردنەوەی دەسەڵاتەكان لو كۆماری توركیا گەیاندووە.
لەهەمان كاتدا ، داود ئۆغڵو داوای لە سەركردەكانی پارتی داد و گەشەپێدان كرد بەشێوەیەكی عەقڵانی و لەسەرخۆ هەڵسەنگاندن بۆ بابەتەكان و تێروانینی حزب بۆ ئایندەی وڵات بكەن .
پیشتر راپۆرتە هەواڵییەكان لە میدیای توركیدا باسیان لە پلانی ئەحمەد داود ئۆغڵو و عەبدوڵلا گولی سەرۆكی پێشووی توركیا كرد بۆ درووستكردنی پارتێكی نوێ و تەحەددا كردنی ئەردۆغان ، بەڵام هێشتا ئەو دوو بەرپرسە گەورەی پیشووی توركیا هیچ هەنگاوێكی كردارییان نەناوە .
بەپێی هەندێك شارەزای تورك ئەحمەد داود ئۆغڵو چاوەرێی شكستی لێدەكرێت ، بەپێی قسەی عەلی ئۆزهان شیكەرەوە لە دامەزراوەی توێژینەوەی سیاسەتی ئابووری توركیا لە ئەنقەرە بێت داودئۆغڵو هیچ كاریگەرییەكی لەسەر حزب یان لایەنگرانی حزبی دەسەلاتدار نییە تاوەكو تەحەددای ئەردۆغانی پێبكات .
داود ئۆغڵو رووبەرووی ڕێبەرێك دەبێتەوە كە نەیارە بەهێزەكانی بەزاند و هەوڵی كودەتای شكستپێهێنا ، پێشتر ئەردۆغان ئەندامانی پارتەكەی لە ئاكامی "خیانەت'كردن ئاگادار كردبۆوە ، ئەردۆگان لەپێشتردا بەهیچ جۆرێك هیچ جۆرە نیشانەیەكی بوونی نەیارێتی لەناو حزبەكەی قبووڵ نەكردووە ، ئێستاش دەزگاكانی راگەیاندنی سەر بە حكوومەتی توركیا هیچ شتێكیان دەربارەی ئەو تیبینییە دەستنووسەی داودئۆغڵو بڵاو نەكردۆتەوە كە میدیای رۆژئاوا باسیان كرد ، ئەوەش نیشانەیەكی روونە لەسەر ئەوەی كە سەرۆك وەزیری پێشووتر و "هەڵگەراوەی ئێستا " بەم نزیكانە لەلایەن هاوڕێكانی حزبییەوە رێوشوێنی تەنبێكردنی لەدژ دەگیرێتە بەر .
وەرگێڕان: ئاكۆ عەبدوڵڵا ئاڵی
