ئایا بەکارهێنانی دەمامک دەبێتە هۆی کەمبوونەوەی ئۆکسجین لە جەستەدا؟

تەندروستی

22/05/2020‌ 343 جار خوێندراوه‌ته‌وه

شارپرێس:

بەکارهێنانی دەمامک وەک یەکێک لە ڕێگاکانی خۆپارێزی لە تووشبوون بە ڤایرۆسی کۆڕۆنا بەکاردەهێنرێت ، بەڵام لەپێگە کۆمەڵایەتییەکاندا زانیاریگەلێک بڵاوبۆتەوە کە گوایە دەمامک کردن دەبێتە هۆی کەمبوونەوەی رێژەی ئۆکسجین لە جەستەدا ، بەڵام ئایا ئەوە راستە؟


یەکێک لە چالاکانی تۆرە کۆمەڵایەتییەکان پۆستێکی بڵاوکردۆتەوە و تێیدا هۆشداری داوە لە پۆشینی دەمامکی پزیشکی و دەڵێت" گومانی تێدا نییە دەمامک کردن دەبێتە هۆی کەمهەڵمژینی ئۆکسجین و ناچاربوون لە هەڵمژینی گازی دووەم ئۆکسیدی کاربۆنی کاتی هەناسەدانەوە کە ئەوەش زۆر مەترسیدارە بۆ جەستە ".


پۆستەکە باسی لەوە کردووە کە دەبێت تەنیا دەمامکی کوتاڵ لەکاتی پێویستیدا بەکاربهێنرێت ، هەرکاتێکیش هەستت بە تەنگەنەفەسی کرد ئەوە دەبێت لاببرێت ، بەتایبەتی ئەوانەی نەخۆشی قورسی هەناسەدانیان هەیە دەبێت زۆر بەئاگابن .


لەبەرانبەردا شارەزایانی تەندروووستی دەڵێن ئەو زانیاریانەی لەو پۆستەدا هاتووە راست نین و دەمامک ئەگەر بەشێوەیەکی درووست بەکاربهێنرێت ئاستەنگ بۆ گەیشتنی ئۆکسجین بۆ جەستە دروست ناکات .
لەوبارەیەوە دوکتۆر ئیمیۆ هیریرا پرۆفیسۆری فیسیۆلۆجیای نەخۆشی Physiopathology بە ئاژانسی فرانس پرێسی گوتووە کە ئەو بەدووری دەزانێت دەمامک ببێتە هۆی کەمچوونی ئۆکسجین بۆ جەستە و تووشکردنی جەستە بە کەمیی ئۆکسجین .


هیریرا گوتویەتی دەمامک دەبێتە هۆی سنووردانان بۆ چوونە ناوی ئەو تەنۆکە گەورانەی کە رەنگە ڤایرۆسیان هەڵگرتبێت ، بەڵام ڕێگە بە هاتن و چوونی هەوا دەدات کە ئەمەش وادەکات دووەم ئۆکسیدی کاربۆن لەنێوان ڕووخسار و دەمامک کۆنەبێتەوە.

هەروەک بەلای شیلی باین بەڕێوەبەری ناوەندی "LA Montagne بۆ نەخۆشییە درمەکان لە زانکۆی تەکساس لە ئەمەریکا ، ئەگەر بێت و دەمامک بەشێوەیەکی درووست بەکاربهێنرێت نابێتە هۆی کەمچوونی ئۆکسجین بۆ جەستە ، ئەویش بەپێی ئەو ئیمەیڵەی تیمی بەدواداچوونی راستییەکانی ئاژانسی فڕانس پرێس بڵاویان کردۆتەوە .


جۆن کریستۆن مامۆستای ئەندازیاری زیندە پزیشکی لە زانکۆی تەکساس بە ئاژانس فەرەنسییەکەی وتووە " ئەگەر کەسێک بەهۆی دەمامک کردنەوە تووشی کەمی ئۆکسجین بوو ئەوە مانای وایە لە توندکردنی  دەمامکەکەی زیادەڕەوی کردووە ، ئەگەر بێت ئەو کەسە تۆماری نەخۆشیی پێشتری هەبووبێت ئەوە تووشی مەترسی دەکات .