لیژنەیه‌كی په‌رله‌مانی كوردستان ده‌چێته‌ به‌غداد

کوردستان

15/09/2020‌ 264 جار خوێندراوه‌ته‌وه

شارپرێس:
لیژنه‌یه‌كی په‌رله‌مانی كوردستان به‌مه‌به‌ستی چارەسەرکردنی کێشەو گرفتەکان لەگەڵ بەغداو گفتوگۆکردن لەسەر مینحەی زیندانیانی سیاسی سه‌ردانی به‌غداد پایته‌خت ده‌كات.

ئەمڕۆ سێشەممە لیژنه‌ی كاروبارى شه‌هیدان و جینۆسایدو زیندانیانى سیاسی لەپەرلەمانی کوردستان، بەسەرپەرشتیى سوسن محەمەد میرخان سەرۆکی لیژنەو ئامادەبوونی جێگرى سه‌رۆكی لیژنه‌و بڕیاردەرو ئەندامان و راوێژکارانى لیژنەکە کۆبووه‌وە.

لەکۆبوونەوەكەدا تەواوى ئەو نوسراوانەى ئاڕاستەى لیژنەکە کرابوون تاووتوێ کران و گفتوگۆ لەسەر ئه‌و نوسراوە کرا کە دەبوو بۆ حکومەت بنێردرێت سەبارەت بەزیندانیانی سیاسی ئەوانەى کە مینحەکەیان تەواو بووە بۆئەوەى کەسانی تر لەشوێنیان دابنرێت کەتاوەکو ئێستا مینحەکەیان وەرگرتووە.

دواتر باسی کچ و کوڕانى شەهیدکرا لە (خوێندنى باڵا) بۆ بەشداریکردنیان لەدووبارەکردنەوەى تاقیکردنەوەى تایبەت بە (ماستەرو دوکتۆرا) لە (زانکۆی سۆران) بۆیە لیژنەیەک پێکهێنرا بۆئەوەى سەردانى زانکۆكه‌ بکات.

پاشان باسی سەردانەکەى دەستەى سەرۆکایەتیى لیژنەکە کرا بۆ لاى سەرۆکى پەرلەمان سەبارەت بەکێشەو گرفتەکانى لیژنەى شەهیدان بەگشتى.

هه‌ر له‌كۆبوونه‌وه‌كه‌دا گفتوگۆکرا سەبارەت بەسەردانى لیژنەكه‌ بۆ (بەغدا)و زۆرینەى ئەندامان هاوڕابوون لەسەر ئەوەى لەسەردانەکەدا وتەکانیان هەماهەنگ بن لەگەڵ هه‌ڵوێستی حکومەتى هەرێمى کوردستان، بۆ ئه‌وه‌ی ئەجێنداى سەردانەکەش بەوردى دیاری بکرێت، بڕیاردرا لەکۆبوونەوەى داهاتوو خاڵەکان دیاری بکرێت.