قایمقامی هەڵەبجە لە رێگەی شارپرێسەوە بەڵێنی چارەسەرو نەشتەرگەری منداڵی بەخێزانێكی هەژار دەدات

کوردستان

25/04/2021‌ 1221 جار خوێندراوه‌ته‌وه

شارپرێس


لە میانی بەشداری كردنی لە بەرنامەی میوانی تۆین، قایمقامی هەڵەبجە بەڵێنی چارەسەرو نەشتەرگەری منداڵی خێزانێكی هەژاری پارێزگای هەڵەبجەدەدات، لەگەڵ هاوكاری و پشتیوانی دارایی و تەندروستی بەردەوامیبۆ خێزانەكە.

 
بەرنامەی میوانی تۆین كە شەوانە لە شارپرێسەوە پەخشدەكرێت، ئەمشەو خێزانێكی لە پارێزگای هەڵەبجە بەسەر كردەوە، كە پێكهاتبوون لە ژن و پیاوێك و چوار منداڵ.

 

باوكی منداڵەكان كارمەندی شارەوانییە و موچەكەی 300 هەزارە و كرێچین، بەوتەی خۆیان موچەكەیان بەشی خەرجی مانگانەیان ناكات و بۆ دابینكردنی پێویستی منداڵەكانیان خێرخوازان هاوكارییان دەكەن.

 

ئەو خێزانە ئاماژەیان بەوەكرد، یەكێك لە منداڵەكانیان نەخۆشە و پێویستی بە نەشتەرگەری و چارەسەری تەندروستییە و هەروەها هیچ كاتێك نەیان توانیوە داواو داخوازی منداڵەكانیان جێبەجێبكەن بەهۆی نەبونی و هەژارییەوە.

 

باوكی منداڵەكان زیاتر باسی دۆخی ژیانی خۆیانی كردوو وتی، 15 ساڵە خەریكی كرێكاریم و عارەبانەم پێیە، تازە دامەزراوم، ئێستا موچەكەم بەشمان ناكات و توانای كرێكاریشم نەماوە.

 

لە بەرنامەكەی ئەمشەودا نوخشە ناسیح قایمقامی هەڵەبجە ئامادەبوو، بەڵێنی بەو خێزانەدا كە بە بەردەوامی ئاگای لێیان دەبێت و ئەوەی پێویستیان بێت بۆیان جێبەجێ دەكات، لە رووی دارایی و تەندروستی و سەردانیكردنیانەوە هاوكارو پشتیوانیان دەبێت.

 

قایمقامی هەڵەبجە بەڵێنی ئەوەیشیدا تەواوی چارەسەر و نەشتەرگەری منداڵە نەخۆشەكەی ئەو خێزانە بگرێتە ئەستۆی خۆی و لە زوترین كاتدا چارەسەری بۆ بكرێت.

 

بەرنامەی میوانی تۆین پرۆژەیەكی خێری شارپرێسە و لە مانگی رەمەزاندا پێشكەش دەكرێت، لە بەرنامەكانی پێشوو تردا لەلایەن بەشێك لە ئەندامانی پەرلەمان و خەڵكانی خێرخوازەوە سپۆنسەری بەرنامەكە كراوە، پێویستی ئەو ماڵە هەژارانەی كە بەسەر كراونەتەوە لە بەرنامەكەدا دابینكراوە.