شارپرێس:
بەهۆی شەڕ و ئاڵۆزییەكانی نێوان هێزەكانی پاراستنی شەنگال و سوپای عێراقەوە سێ هەزار و 500 هاوڵاتی ئاوارەی شەنگال بوون و ئاڵۆزییەكانیش بەردەوامییان هەیە.

ماجید سەید ساڵح، جێگری پارێزگاری دھۆک بە بە میدیاكانی نزیك لە پارتی وت: تا ئێستا زیاتر لە 600 خێزانی شەنگال کە نزیکەی سێ هەزار و 500 کەس دەبن بەھۆی ئاڵۆزییەکانی شەنگال ئاوارەبوون و گەیشتوونەتە سنووری پارێزگای دهۆک.

جێگری پارێزگاری دھۆک ویشی: کارگێری پارێزگاری دھۆک ھەموو ئامادەکارییەکی کردووە بۆ جێگرکردنیان لە کەمپەکانی سنووری پارێزگای دھۆک.

هەر لەسەر ئەو پرسە، ئەمڕۆ، نێردەی تایبەتی نەتەوە یەکگرتووەکان لە عێراق لەبارەی شەڕ و پێكدادانەكانی نێوان سوپای عێراق و یەبەشەوە لە تویتەری خۆی بڵاویكردەوە، زۆر نیگەرانین لە هەمبەر پێکدادانەکانی شەنگال و لێکەوتە خراپەکانی بۆ سەر هاوڵاتیانی سڤیل.

یونامی جەختیش دەکاتەوە، کە پێویستە ئاسایش و سەقامگیریی شەنگال لەسەروی هەموو شتێک بێت، دەشڵێت: ئەوان لە ڕابردوودا ئازاری زۆریان چەشتووە و شایستەی ئاشتین لە سایەی دەسەڵاتی دەوڵەتدا.

لە بەشێكی تری تویتەكەی نەتەوە یەكگرتووەكاندا هاتووە: تێکدەرانی ناوخۆیی و دەرەکی لە شەنگال جێیان نابێتەوە.

لە شەوی ڕابردووەوە شەڕ و پێدادان لە نێوان سوپای عێراق و هێزەكانی پاراستنی شەنگال ـ یەبەشەدا لە شەنگال دەستپێکردووە و شەڕ و ئاڵۆزیی بەردەوامە و  لە ڕووبەڕووبوونەوەی ئەمڕۆی سوپای عێراق و یەبەشەدا سەربازێکی سوپای عێراق کوژرا.

س.س