شارپرێس:

سەرۆکی پارتی بزوتنەوەی نەتەوەپەرستی تورکیا ڕایدەگەیەنێت، كۆنفرانسی یەکڕیزی و یەکهەڵوێستی كورد لە ڕۆژئاوای کوردستان بە پشتیوانی و هاندانی ئەمریكاو فەرەنسا بەڕێوەچوە، دەشڵێت،" دەبێت پەكەكە دەستبەجێ چەك دابنێت و خۆی هەڵبوەشێنێتەوە ".

دەوڵەت باخچەلی، سەرۆکی پارتی بزوتنەوەی نەتەوەپەرستی تورکیا (مەهەپە) ئاماژەی بەوەکرد،" بە پاڵپشتی ئەمریکا و فەرەنسا كۆنفرانسی یەکڕیزی و یەکهەڵوێستی كورد لە ڕۆژئاوای کوردستان رێکخراوە، بڕیارەکانیشی دژی یەکگرتویی و یەکپارچەیی خاکی سوریایە ".

باخچەلی باسی لەوەشکردوە، دەرئەنجامەکانی کۆنفرانسەکە پێشێلکردنی ئەو رێککەوتنەیە کە لە نێوان مەزڵوم عەبدی فەرماندەی هێزەکانی سوریای دیموکرات و ئەحمەد شەرع، سەرۆک کۆماری سوریا واژو کرا.

لەبارەی پەکەکەش، باخچەلی دەڵێت،" پێویستە دەستبەجێ کۆنگرەی خۆی ببەستێت و پڕۆسەی هەڵوەشاندنەوەی رێکخراوەیی خۆی تەواو بکات ".