شارپرێس:
کۆنگرەی نه‌ته‌وه‌یی کوردستانی سەباره‌ت بەهەڵبژاردنی په‌رله‌مانى عێراق په‌یامێكى به‌په‌له بڵاوده‌كاته‌وه‌و داواكاریه‌ك ئاراسته‌ى سه‌رجه‌م هێزو لایه‌ن‌و هاوڵاتیانى كورد ده‌كات، ده‌شڵێت، "دوربكه‌ونه‌وه لەهەموو ئەو کردەوانەی زیان بەناوبانگیی سیاسیی هەرێم‌و مافەکانی هاوڵاتیانی هه‌رێم ده‌گه‌یه‌نن".
له‌ڕاگه‌یه‌نراوێكدا كه وێنه‌یه‌كى تایبه‌ت بۆ شارپرێس نێردراوه، كۆنگره‌ى نه‌ته‌وه‌یى كوردستان ده‌ڵێت، "ئێمە لەکۆنگرەی نه‌ته‌وه‌یی کوردستان، لەکاتێکدا بەسەرنجێکی تایبەت چاودێریی پێشهاتە سیاسییەکانی عێراق‌و ناوچەکە دەکەین، جەخت لەسەر ئەوە دەکەینەوە، هەڵبژاردنی ئێستای عێراق گرنگییەکی تایبەتیان هەیە بۆ هەرێمی کوردستان‌و گەلەکەی، بەهۆی کاریگەرییە ڕاستەوخۆیەکەیان لەسەر داهاتوی سەقامگیریی سیاسیی‌و دەستوریی لەوڵاتدا".
له‌و ڕاگه‌یه‌نراوه‌دا هاتوه، "جەخت لەسەر ئەوەدەکەینەوە، سەرکەوتنی ئەم هەڵبژاردنه پێویستی بەدابینکردنی کەشێکی ئازادانەو دروست‌و شەفاف هەیەو مسۆگەرکردنی ئازادیی هەڵبژاردن بەبێ هیچ فشارو دەستێوەردانێک، لەگەڵ دورکەوتنەوە لەهەموو ئەو کردەوانەی کە زیان بەناوبانگیی سیاسیی هەرێم‌و مافەکانی هاوڵاتیانی هه‌رێم بگه‌یه‌نن".
سه‌باره‌ت به‌ناوچه دابڕێندراوه‌كانیش، كۆنگره‌ى نه‌ته‌وه‌یى نوسیویه‌تى، "داوا لەگەلی خۆمان دەکەین، بەشداریی سیاسیی بکەن بەئەرکی خۆیان، بێگومان دەنگدانیش بەیەک لەکۆڵەکەکانی دیموکراسی دادەنرێت، خەڵکی ئێمە دەبێت بەو بەرپرسیارێتیە هەستێت کە چونەسەر سندوقەکانی دەنگدانە بەتایبەتیش لەناوچەکانی مادەی 140".
داواكاریه‌كى به‌په‌له‌ش ئاراسته‌ى سه‌رجه‌م هێزه سیاسییه‌كان ده‌كات‌و ڕایده‌گه‌یه‌نێت، "داواش له‌هەموو پارت‌و هێزو کەسە سەربەخۆکانی ناو ئەم پرۆسەیە دەکەین، ئەرکە نیشتیمانی‌و ئەخلاقییەکانیان فه‌رامۆشنه‌كه‌ن‌و بەڕۆحی بەرپرسیارێتییەوە کاربکەن لەپێناو، بەهێزکردنی یەکڕیزیی کورد، پاراستنی مافە دەستورییەکانی گەلی کوردستان، چەسپاندنی بنەماکانی هاوژیان‌و هاوڵاتێتی نێوان هەموو پێکهاتەکان، پێدانی ئەولەویەت بەکێشەکانی ژن‌و ژینگە لەبەرنامەی پەرلەمانی داهاتودا".
بۆ هێزه سیاسییه‌كانى عێراقیش، كۆنگره‌ى نه‌ته‌وه‌یى ده‌ڵێت، "هه‌روه‌ك ڕوو به‌ته‌واوی هێزه سیاسییه‌كانی عێراقیش ده‌ڵێین، بنه‌ماكانی پێكه‌وه‌ژیان‌و یه‌كترقبوڵكردن، كلیلی چاره‌سه‌ریی‌و ئاشتییه بۆ ئاینده‌ی عێراق، گەلی ئێمە بەئاگایە کە هەوڵەکان بەردەوامن بۆ بەکارهێنانی ناکۆکییە ناوخۆییەکان بۆ زیانگەیاندن بەمافە دەستورییەکان لەعێراقی فیدراڵ کە بەری ڕەنجی تێکۆشانی چەندین ساڵەی میلەتەکەمان، پاراستنی ئەم دەستکەوتانە لەسەرملی هەرکەسێکی نیشتمانپەروەرە".
سه‌باره‌ت به‌جیاوازیى نێوان هێزه سیاسییه‌كانی هه‌رێمیش، كه‌نه‌كه ته‌ئكیدده‌كاته‌وه، "ئه‌گه‌رچی له‌بیربۆچونه سیاسییه‌كانیشدا جیاوازبن، دەبێت ئەو ڕاستیە بزانین جیاوازییەکان هێزن بۆ ئازادیی‌و گەیشتن بەپرسی هاوبەش ئەگەر بەدیهاتنی پرسە نەتەوەییەکەمان مەبەستبێت، هەربۆیە دەبێت بەیەکگرتویی بمێنینەوە لەبەرەنگاربونەوەی ئەو مەترسیی‌و ئاڵه‌نگاریانه‌ی کە هەرێم‌و مافەکانی به‌ئامانجده‌گرن".
له‌كۆتاییشدا ڕایگه‌یاندوه، "بەیەکێتیمان‌و هۆشیاریی گەلەکەمان، بەردەوامدەبین لەبونیادنانی هەرێمێکی دیموکراتی‌و ئازاد کە شایانی قوربانییەکانی کوردو خەباتەکەیان بێت لەدژی فاشیزم‌و دیکتاتۆریی‌و له‌پێناو به‌دیهێنانی دادپەروەریی‌و شكۆمه‌ندی بۆ هەموو کوردستانییان".
