شارپرێس:

چەند ڕێکخراوێکی ناحکومی و پەرلەمانتارێکی کوردی تورکیا سەرکۆنەی ڕێگریی دەسەڵاتدارانی تورکیایان کرد لە ناردنی کاروانێکی هاوکارییە مرۆییەکان بۆ شاری کۆبانێ لە رۆژئاوای کوردستان.

 
 ئەم کاروانە کە لەلایەن پلاتفۆرمی ئامەد بۆ هاوپشتی و پاراستن ڕێکخرابوو، پێکهاتبوو لە 25 بارھەڵگر کە ئاو، شیر و پێداویستیی سەرەکییان بارکردبوو، بەڵام لە سنوور ڕاگیران. ئەم ئابڵۆقەیە لە کاتێکدایە کە کۆبانێ بەهۆی گەمارۆی هێزەکانی سووریاوە لە بارودۆخێکی مرۆیی سەختدایە و شارەکە بەدەست کەمیی خۆراک و کارەباوە دەناڵێنێت.

 پەرلەمانتار عەدالەت کایا لە پارتی یەکسانیی و دیوکراتیی گەلان (دەم پارتی) ڕایگەیاند کە هێشتا بارهەڵگرەکان لە کۆگاکاندا وەستاون و هەوڵەکان بۆ کردنەوەی دەروازەی سنووریی مورزیت پنار بەردەوامە، کە لە ساڵی 2016ەوە داخراوە.

 هەرچەندە تورکیا پێشنیاری بەکارهێنانی دەروازەی ئۆنجو پناری کردووە کە 180 کیلۆمەتر دوورە، بەڵام ڕێکخراوەکان ئەو پێشنیارە ڕەتدەکەنەوە و دەڵێن گەرەنتی نییە هاوکارییەکان بگەنە شوێنی مەبەست.

دەم پارتی و جەهەپە داوای کردنەوەی دەستبەجێی سنوور دەکات بۆ ڕێگریکردن لەروودنای  کارەساتێکی مرۆیی گەورە لە ناوچەکەدا.

ئاکۆ عەبدوڵڵا ئاڵی