شارپرێس:
سەرچاوەیەک لەفەرمانگەی تەندروستی کەرکوک ڕایگەیاند، تەقینەوەی پاشماوەیەکی جەنگی لە گوندی ئەلبوسەیفی سەر بە ناحیەی ڕیاز لە باشوری ڕۆژئاوای پارێزگای کەرکوک، بوە هۆی کوژران و برینداربونی چەندین هاوڵاتی مەدەنی، دوای ئەوەی لەلایەن منداڵانەوە یاری پێکرابوو.

سەرچاوەکە بە پێگەی شەفەق نیوزی راگەیاندوە، ئەو تەقەمەنییە لە ناوچەیەکی نیشتەجێبوندا بوە و لەکاتی دەستکاریکردنیدا تەقیوەتەوە، ئەمەش دەستبەجێ گیان لەدەستدانی ژنێک و منداڵێکی لێکەوتۆتەوە، جگە لە برینداربونی نۆ کەسی دیکە کە باری تەندروستیی هەندێکیان ناجێگیرە.

هەروەها تەقینەوەکە ترس و دڵەڕاوکێی زۆری لای دانیشتوان دروست کردوە و زیانی ماددی بەر چەند ماڵێکی نزیک ڕوداوەکە کەوتوە.

ئەوەش هاتوە، تیمەکانی فریاکەوتن و بەرگری شارستانیی گەیشتونەتە شوێنەکە و بریندارەکانیان بۆ نەخۆشخانە و تەرمی قوربانییەکانیان بۆ پزیشکی داد گواستوەتەوە، جگە لەوەی هێزە ئەمنییەکانیش گەمارۆی ناوچەکەیان داوە و تیمە پسپۆڕەکان دەستیان بە لێکۆڵینەوە کردوە بۆ زانینی وردەکاری زیاتر.

ئاکۆ عەبدوڵڵا ئاڵی