شارپرێس:
حکومەتی عێراق لەهەڵوێستێکدا، بەفەرمی ئیدانەی ئەو هێرشانە دەکات کە دەکرێنەسەر هێزەکانی پێشمەرگەو حەشدی شەعبی، بەمەش بەغدا خۆی لەنێوان بەرداشی چوار لایەنی هێرشبەردا دەبینێتەوە کە بریتین لە(ئەمریکا، ئیسرائیل، ئێران‌و گروپەکانی حەشدی شەعبی)، سەرچاوە سیاسییەکانیش ئاماژە بە"سێگۆشەیەکی ئاڵۆز" دەکەن کە عێراقی تێدا گیربوە، هێرشەکانی ئێران بۆسەر هەرێم، پەرچەکردارەکانی ئەمریکاو ئیسرائیل بۆسەر حەشدو بێلایەنیی هێزی پێشمەرگە.

هێرشی "دۆست‌و نەیار" بۆسەر پێشمەرگە
به‌گوێره‌ى ناوەڕۆکی کۆبونەوەی ئەنجومەنی وەزیران، عێراق ڕوبەڕوی شەپۆلێکی هێرش بوەتەوە کە تێیدا ئێران‌و گروپەکانی ناو حەشدی شەعبی بەردەوام هێرشدەکەنەسەر هەرێمی کوردستان‌و هێزەکانی پێشمەرگە، ئەم ئیدانەکردنەی حکومەتیش لەکاتێکدایە، پێشمەرگە تاکە هێزە هیچ جۆرە هێرشێکی بۆسەر هیچ لایەن‌و شوێنێک ئەنجامنەداوەو تەنها لەپێگەی بەرگریدا بوە، کەچی لەلایەن دراوسێ‌و هاوبەشە ئەمنییەکانی ناوخۆوە دەکرێتە ئامانج.

بەرەی دوەم؛ ئەمریکاو ئیسرائیل دژی حەشد
لەلایەکی دیكه‌وه‌، حکومەتی عێراق ئیدانەی هێرشەکانی ئەمریکاو ئیسرائیل دەکات کە دەکرێنەسەر بارەگاکانی حەشدی شەعبی، بەم هەڵوێستە، عێراق دەیەوێت بڵێت، ڕێگه‌نادات خاکی وڵاتەکە ببێتە گۆڕەپانی یەکلاکردنەوەی ململانێی واشنتۆن‌و تەلئەبیب لەگەڵ تاران.

پابەندییەکی پڕ لەئاڵنگاریی
ئەنجومەنی وەزیران جەختیکردەوە، کە "پابەندن بەپاراستنی دامەزراوەکان، باڵیۆزخانەکان‌و نێردە دیپلۆماسییەکان"، ئەمەش پەیامێکی ناڕاستەوخۆیە بۆ ئەو گروپانەی حەشد کە هێرشدەکەنەسەر نێردە بیانییەکان، کە حکومەت نایەوێت وڵات بەرەو گۆشەگیریی نێودەوڵەتی ببرێت.

حکومەته‌كه‌ى سودانی، ئێستا لەبەردەم هاوکێشەیەکی مەحاڵدایە؛ لەلایەک ئیدانەی ئێران‌و حەشد دەکات بۆ هێرشەکانیان بۆ سەر پێشمەرگە، لەلایەکی دیكه‌شه‌وه‌ ئیدانەی ئەمریکاو ئیسرائیل دەکات بۆ هێرشەکانیان بۆ سەر حەشد، ئەم ئیدانەکردنە دەستەجەمعییەش نیشانەی ئەوەیە کە عێراق دەیەوێت سەروەریی خۆی لەدەستی هەمولایەنەکان دەربهێنێت، بەڵام ئایا دەتوانێت ڕێگریی لەو هێرشانە بگرێت؟.