شارپرێس:

سەرۆک کۆماری عێراق دڵنیایی بە سەرۆک کۆماری ئێران دەدات کە رێگە نادرێت خاکی عێراق و هەرێمی کوردستان بۆ هێرشکردنەسەر ئێران بەکاربهێنێت، هاوکات هێرشە موشەکی و درۆنییەکانیش بۆ سەر هەرێمی کوردستان ئیدانە دەکات.

سەرۆکایەتی کۆماری عێراق بڵاویکردەوە، لەتیف رەشید، سەرۆک کۆماری عێراق پەیوەندییەکی تەلەفۆنی لەگەڵ مەسعود پزیشکیان، سەرۆک کۆماری ئێران ئەنجامدا و هەڵوێستی عێراقی بۆ رەتکردنەوەی جەنگی ئێران دوپاتکردەوە و داوای کرد دەستبەجێ کردە سەربازییەکان رابگیرێن و قەیرانەکان لەرێی گفتوگۆوە چارەسەر بکرێن.

لەتیف رەشید باسی لەوەکردوە،" گەل و حکومەتی عێراق پاڵپشتی گەلی ئێران دەکەن و بەرخودانیان بەرامبەر دەستدرێژییەکان بەرز دەنرخێنن ".

سەرۆک کۆماری عێراق رونیشیکردەوە کە حکومەتی هەرێمی کوردستان کاردەکات بۆ پاراستنی سنورەکان رێگەگرتن لە هەر هەوڵێک بۆ قۆستنەوەی خاکی عێراق و بەکارهێنانی بۆ هێرشکردنەسەر ئێران و زیادکردنی ئاڵۆزییەکان.

هاوکات، لەتیف رەشید لەپەیوەندییە تەلەفۆنییەکەیدا لەگەڵ پزیشکیان هێرشەکانی سەر هەرێمی کوردستانی ئیدانەکرد و جەختیکردەوە کە ئەو کردەوانە سەقامگیری لەناوچەکە بەدیناهێنێت، بەڵام گرژی و ئاڵۆزییەکان زیاتر دەکەن.