شارپرێس:

لەکاتێکدا حکومەتی عێراق لەژێر فشاری قەیرانە هەرێمییەکان‌و کێشە نەوتییەکاندایە، سستی لەنۆژەنکردنەوەی بۆڕیی نەوتی (کەرکوک ـ جەیهان) کێشەیەکی سیاسیی گەورەی لەبەغدا تەقاندەوە، لایەنە شیعەکانی ناو چوارچێوەی هەماهەنگی پەرلەمانتارەکانیان جوڵاندوە بۆ لێپرسینەوە لەحەیان عەبدولغەنی وەزیری نەوتی عێراق.

سەرەڕای ئەوەی وەزارەتی نەوت ماوەی مانگێکە بانگەشەی ئەوەدەکات، نۆژەنکردنەوەی بۆڕییە ستراتیژییەکە لەقۆناغی کۆتاییدایە، بەڵام زانیارییە دزەپێکراوەکان ئاماژە بەوەدەکەن، بۆرییەکە هێشتا ئامادەنییە، ئەم زانیارییە چەواشەکارانە بوەتە هۆی توڕەیی پەرلەمانتاران کە وەزارەت تۆمەتباردەکەن بەوەی کاتی بەفیڕۆداوەو بەڵێنی ناڕاستی داوە.

ئەوەی کێشەکەی بۆ لایەنە شیعەکان هەستیارترکردوە، دوو هۆکاری سەرەکین، یه‌كه‌میان گرژییەکانی گەروی هورمزه‌ كه‌ عێراق دەترسێت ئەگەر ئەو گەروە دابخرێت، ڕێگەی هەناردەی باشوری نەمێنێت، بۆیە هیوای زۆری لەسەر بۆریی باکور (کەرکوک ـ جەیهان) هەڵچنیبوو، دوه‌م، پەیوەندیی لەگەڵ هەولێره‌، سستی لەچاککردنەوەی ئەم بۆرییە، بەغدای ناچارکردوە لەبەرامبەر هەرێمی کوردستاندا سازش بکات، چونکە بەدیلێکی خێرای لەدەستدانییە.

بەهۆی ئەم شکستە تەکنیکییەوە، حکومەتی عێراق کەوتوەتە ژێر فشار بۆ ئەوەی ڕێگەی مەترسیدارو پڕ تێچوو هەڵبژێرێت، ئەویش هەناردەکردنی نەوتە بەتانکەر لەڕێگەی وشکانییەوە بەرەو بەندەری بانیاس لەسوریا کە ئەمەش پێویستی بەڕێککەوتنی سیاسیی ئاڵۆز هەیە.

بۆریی (کەرکوک ـ جەیهان) کە توانای گواستنەوەی زیاتر لەملیۆنێک‌و نیو بەرمیل نەوتی هەیە، لەساڵی 2013وە بەهۆی کردەوە تێکدەرانەکانەوە پەکیکەوتوە، ئێستا پەرلەمانتاران دەپرسن، بۆچی دوای زیاتر لە10 ساڵ‌و خەرجکردنی پارەیەکی زۆر، هێشتا وەزارەتی نەوت ناتوانێت ئەم خوێنبەرە ئابورییە بخاتەوەگەڕ؟

چاوەڕواندەکرێت لەدانیشتنەکانی داهاتوی پەرلەماندا، وەزیری نەوت‌و سەرۆکی کۆمپانیای نەوتی باکور ڕوبەڕوی پرسیاری سەخت ببنەوە کە ڕەنگە چارەنوسی پۆستەکانیان بخاتە مەترسییەوە.