شارپرێس:
تۆڕیی CBS Newsی ئەمریکی لە ڕاپۆرتێکی
بەرفراواندا وردەکاریی ڕووبەڕووبوونەوەیەکی سەربازیی بێوێنەی لە نێوان هێزە دەریایییەکانی
ویلایەتە یەکگرتووەکانی ئەمریکا و هێزەکانی ئێران لە گەرووی هورمز ئاشکرا کرد.
راپۆرتەکە باسی لەوەکردووە کە ئەم ڕووداوە کە بە یەکێک لە
توندترین پێکدادانە ڕاستەوخۆکان دوای ڕێککەوتنی ئاگربەستی ئەمدواییە دادەنرێت، چەند
کاتژمێرێکی خایاندووە و تێیدا جۆرە جیاوازەکانی چەک و تەکنەلۆژیای سەربازی بەکارهێنراون.
بەپێی زانیارییەکانی بەرپرسانی ئەمریکی، سێ کەشتیی تێکشکێنەری
دەریایی بە ناوەکانی "یو ئێس ئێس تراکستون"، "یو ئێس ئێس میسون"
و "یو ئێس ئێس رافائیل بیرالتا" لە کاتی تێپەڕبوونیان بە گەرووی هورمزدا، کەوتوونەتە ژێر هێرشێکی چڕی پۆلێک
بەلەمی خێرای ئێرانی، فڕۆکەی بێفڕۆکەوان و مووشەکی بالیستی.
بەرپرسە ئەمریکییەکان کە نەیانویستووە ناویان ئاشکرا بکرێت،
جەختیان لەوە کردۆتەوە کە ئەم هێرشە لە ڕووی کات و توندییەوە زۆر جیاواز بووە لەو
هێرشانەی کە لە ڕۆژانی ڕابردوودا تۆمار کرابوون.
ئەوەش هاتووە: لە کاتی ڕووداوەکەدا، هێزە ئەمریکییەکان سیستەمی
بەرگریی "فرەچین"یان چالاک کردووە، بەشێوەیەک کاتێک بەلەمی خێرای ئێرانییەکان
هێندە لە کەشتییەکان نزیک بوونەتەوە کە مەترسیی پێکدادانی ڕاستەوخۆ دروست بووە،
ستافی تێکشکێنەرەکان بە چەکی سووک و تۆپی دەریایی 5 ئینجی وەڵامیان داونەتەوە.
هاوکات سیستەمی بەرگریی نزیک (CIWS) بۆ تێکشکاندنی ئامانجە ئاسمانییەکان بەکارهێنراوە.
لە ئاسمانیشەوە، هەلیکۆپتەرەکانی جۆری "ئاپاچی" بە بەکارهێنانی مووشەکی
"هێڵفایەر" و ڕەشاشی قورس، ڕووبەڕووی هەڕەشەکان بوونەتەوە و فڕۆکە جەنگییەکانی
تریش چەتری پاراستنیان بۆ کەشتییەکان دابین کردووە.
فەرماندەیی ناوەندی ئەمریکا (CENTCOM) لە بەیاننامەیەکدا ڕایگەیاند کە هێزەکانیان
لە 7ی ئایاری 2026، نەک هەر هێرشەکانیان بەرپەرچ داوەتەوە، بەڵکو زنجیرەیەک هێرشی
پێچەوانەیان بۆ سەر ئەو بنکە سەربازییانەی ئێران ئەنجام داوە کە بەرپرس بوون لەو هێرشانە.
ئەم ئامانجانە پێکهاتبوون
لە شوێنی هەڵدانی مووشەک و درۆن، ناوەندەکانی فەرماندەیی و چاودێری، و دامەزراوەکانی
هەواڵگری. سێنتکۆم جەختی کردۆتەوە کە هیچ زیانێکی گیانی یان ماددی بەر کەشتییە ئەمریکییەکان
نەکەوتووە و ئەم هەنگاوەش تەنها بۆ بەرگری لە خۆکردن بووە.
لە بەرامبەردا، تاران گێڕانەوەیەکی تەواو جیاوازی هەیە و
وتەبێژی بارەگای سەربازیی "خاتەمول ئەلئەنبیا" ئەمریکای بەوە تۆمەتبار
کرد کە هێرشی کردۆتە سەر کەشتییەکی نەوتی و کەشتییەکی تری ئێرانی لە نزیک کەناراوەکانی
"جاسک".
هەروەها ئاماژەی بەوە کردووە کە فڕۆکە ئەمریکییەکان ناوچە
مەدەنییەکانی بەندەر خەمیر و دوورگەی قەشمیان بۆردوومان کردووە و هەڕەشەی وەڵامدانەوەی
توندیان کردووە.
ئاکۆ عەبدوڵڵا ئاڵی