شارپرێس:
بەپێی ڕاپۆرتێکی ڕۆژنامەی (The National)، عێراق پلانی هەیە 20 سیستەمی بەرگریی ئاسمانیی پێشکەوتوو لە تورکیا بکڕێت.

بەگوێرەی راپۆرتەکە، فەریق ڕوکن سەعد حەربییە لە میانی بەشداریی لە پێشانگای(  SAHA Expo 2026  ) لە ئەستەنبوڵ ڕایگەیاندووە کە عێراق هەوڵ دەدات توانا بەرگرییەکانی بۆ بەرەنگاربوونەوەی مەترسییەکانی درۆن و مووشەک پەرەپێ بدات، بەتایبەت دوای ئەو هێرشانەی لە کاتی ململانێکانی نێوان ئەمریکا و ئێراندا کرانە سەر دامەزراوە سەربازییەکان.

ئەوەش هاتووە: لە ناو لیستی خواستەکانی عێراقدا، سیستەمی (SIPER)ی دوورمەودا دیارترینە کە مەودای وەشانی نوێی دەگاتە 180 کم و ڕادارەکەی تا 600 کم کار دەکات.

 هەروەها بایەخ بە سیستەمی (HISAR-O) دەدرێت بۆ مەودای 30 و (HISAR-A) بۆ مەودای کورت تا 15کم . جگە لەمانە، عێراق دەیەوێت سیستەمی (KORKUT)ی دژە درۆن و مووشەکی (SUNGUR) بەدەست بهێنێت کە مەودای 8 کم هەیە.

چاودێران پێیان وایە پەنابردن بۆ بژاردەی تورکی بۆ عێراق بە بژاردەیەکی گونجاو دادەنرێت، چونکە پیشەسازییە بەرگرییەکانی تورکیا هاوسەنگییان لە نێوان تەکنەلۆژیای سەردەم و تێچووی کەمدا درووست کردووە.

جگە لەوەی تورکیا لە پرۆسەی هەناردەکردنی چەکدا ئاسانکاریی دەکات و بە پێچەوانەی وڵاتانی ڕۆژئاوا و ڕۆژهەڵات، مەرجی سیاسی و سەربازیی ئاڵۆز بۆ فرۆشتنی چەک بەسەر عێراقدا ناسەپێنێت.

ئاکۆ عەبدوڵڵا ئاڵی