شارپرێس:

دوای متمانەدان بە کابینەکەی عەلی زەیدی، کێبڕکێ لەسەر پۆست و دەسەڵات ماڵی حاکمی شیعەی توشی لێکترازان کرد، کشانەوەی بەکۆمەڵی فراکسیۆنەکان و هەوڵدان بۆ دروستکردنی بەرەی نوێ، نەخشەی سیاسیی بەغدای خستوەتە لێواری گۆڕانکارییەکی ڕیشەیی.

کشانەوەو یاخیبون.. گورزێک بۆ سودانی
یەکەم پریشکی ئەم تەقینەوەیە لەناوخۆی فراکسیۆنی "ئاوەدانکردنەوەو گەشەپێدان" بەسەرۆکایەتی محەمەد شیاع سودانی دەستیپێکرد، هەریەکە لە(کوتلەی په‌یمانى نیشتمانى به‌سه‌رۆكایه‌تى فالح فەییاز، جوڵانەوەی سۆمەرییەکان به‌سه‌رۆكایه‌تى ئه‌حمه‌د ئه‌سه‌دى، بەفەرمی کشانەوەی خۆیان ڕاگەیاند، ئەوان سودانی‌و هاوپەیمانەکانی بەوە تۆمەتباردەکەن کە پشتیان لەڕێککەوتنەکان کردوەو سیاسەتی پەراوێزخستن پەیڕەودەکەن.

مالیکی‌و بەرەی ناڕازییەکان.. پلانێک بۆ گەمارۆدانی حکومەت
لەپشت پەردەوە، نوری مالیکی سەرکردایەتی جوڵانەوەیەکی فراوان دەکات بۆ کۆکردنەوەی هەموو ئەو هێزانەی لەدابەشکردنی وەزارەتەکاندا پێیانوایه‌ پشکیان پێنەدراوە، مالیکی بەهەماهەنگی لەگەڵ هادی عامری‌و فالح فەییاز، خەریکی دروستکردنی بەرەیەکی پەرلەمانیی گەورەن تا وەک گوشارێک دژی حکومەتەکەی زەیدی بەکاری بهێنن، بەتایبەت دوای ئەوەی نەیانتوانی کاندیدەکانیان بۆ وەزارەتە سیادییەکانی وەک (ناوخۆو خوێندنی باڵا) تێپەڕێنن.

حکومەتێکی نیوەچڵ.. نۆ وەزارەت بەبەتاڵی مانەوە
قەیرانەکە کاتێک قووڵتر بوەوە کە پەرلەمان تەنها دەنگی بە14 وەزیر دا لەکۆی 23 وەزیر، ئەمەش دەریدەخات کە زەیدی لەناو زەقنەوتێکی سیاسیی وا گیریخواردوە کە ڕەنگە نەتوانێت کابینەکەی تەواوبکات.

هێرشی توندی دەوڵەتی یاسا
ئیبتیسام هیلالی پەرلەمانتاری دەوڵەتی یاسا، ڕاستەوخۆ پەنجەی تۆمەتی بۆ هاوپەیمانیی نێوان سودانی‌و حەلبوسی درێژکردو ڕایگەیاند، ئەوان ڕێککەوتنی ژێر بەژێریان کردوە بۆ پەکخستنی کاندیدی وەزارەتە سیادییەکان، ئەمەش سەقامگیریی ئەمنی‌و زانستیی وڵات دەخاتە مەترسییەوە.

نەخشەی نوێی هێز.. کێبڕکێ لەسەر مانەوە نەک تەنها پۆست
چاودێران پێیانوایە، ئەوەی لەناو پەرلەمانی عێراق دەگوزەرێت، تەنها ناڕەزایەتییەکی کاتی نییە، بەڵکو دەسپێکی قۆناغێکی نوێیە لەدوبارە دابەشکردنەوەی هێز لەناوماڵی شیعەدا، دانیشتنى متمانەدان بەحکومەت، پەردەی لەسەر ئەو ڕکابەرییە توندە لادا کە لەنێوان پێکهاتەکانی چوارچێوەی هەماهەنگی‌و هاوپەیمانەکانیاندا هەبوو بۆ کۆنترۆڵکردنی جومگەکانی دەسەڵات.

ستراتیژیی گوشار لەناوەوە.. نە ئۆپۆزسیۆن نە بێدەنگیی
به‌گوێره‌ى شرۆڤەی ناوەندە سیاسییەکان، ئەو لایەنانەی هەستیانکردوە لەحکومەتەکەی زەیدی-دا پەراوێزخراون، پەنایان بردوەتەبەر پلانێکی نوێ كه‌ بریتیه‌ له‌دروستکردنی کوتلەی گەورە بۆ ئەوەی ببنە هێزێکی دانوستانکاری بەهێزو ناچنە ڕیزی ئۆپۆزسیۆنی تەواوەتی، بەڵکو دەیانەوێت لەناو حکومەتدابن‌و لەهەمانکاتدا وەک کارتێکی فشار پەرلەمان بەکاربهێنن بۆ سەپاندنی هاوسەنگی‌و وەرگرتنەوەی ئەو دەستکەوتانەی لەدەستیانداوە.

گەورەترین تاقیکردنەوەی زەیدی
ئێستا بۆ هەمووان ڕون بوەتەوە کە گەورەترین ئالێنگاریی بەردەم عەلی زەیدی، تەنها پڕکردنەوەی کورسییە بەتاڵەکانی کابینەکەی نییە، بەڵکو کوژاندنەوەی ئەو ئاگرەیە کە لەناوجەرگەی ماڵە سیاسییەکەی خۆیدا کڵپەی سەندوە، ململانێی خوێناوی لەسەر وەزارەتە سیادییەکان‌و هەژمونخوازیی لایەنەکان، سەقامگیریی ئەم حکومەتەی خستوەتە لێواری کەوتن‌و شەرعییەتەکەی ڕوبەڕوی پرسیارێکی گەورە کردوەتەوە.