شارپرێس:

زانکۆی پۆلیتەکنیکی گەرمیان ڕایگەیاند، وه‌زاره‌تی خوێندنی باڵا و توێژینه‌وه‌ی زانستی عێراق، بەفەرمی دانی نا به‌ زانکۆی پۆلیتەکنیکی گەرمیان و سه‌رجه‌م کۆلێج و په‌یمانگاکانی.

زانکۆی پۆلیتەکنیکی گەرمیان لەڕاگەیەنراوێکدا ئاماژەی بەوەکرد، له‌بڕیارێکی فه‌رمیدا له‌ ڕێکه‌وتی 9ـی 7ـی 2026، وه‌زاره‌تی خوێندنی باڵا و توێژینه‌وه‌ی زانستی عێراق، دانپێدانانی فه‌رمی به‌ زانکۆی پۆلیتەکنیکی گەرمیان و سه‌رجه‌م کۆلێج و په‌یمانگاکانیدا ڕاگه‌یاند، به‌پێی ئه‌م بڕیاره‌، زانکۆکه‌ ده‌خرێته‌ ناو ڕێبه‌ری وه‌رگرتنی ناوه‌ندی خوێندکاران بۆ ساڵی خوێندنی ( 2026- 2027).

هەروەها لە ڕاگەیەندراوەکەدا هاتووە، پێکهاتەکانی زانکۆکە کە دانپێدانانیان بۆ دەرچووە ئەمانەن:

١- کۆلێجی تەکنیکی کەلار (تەکنیکی پەرستاری، ئەندازیاری کارەبا و کۆمپیوتەر، تەکنیکی شیکاری نەخۆشییەکان).

٢- کۆلێجی تەکنیکی کفری (تەکنیکی کارگێڕی کار، تەکنیکی چارەسەری خۆراکی، تەکنیکی تەکنەلۆجیای زانیاری).

٣- کۆلێجی تەکنیکی کارگێڕی-ڕزگاریی (تەکنیکی ژمێریاری، تەکنیکی میدیا).

٤- پەیمانگای تەکنیکی کەلار (تەکنیکی پەرستاری، تەکنیکی ڤێتێرنەری، تەکنیکی ڕووپێوی، تەکنیکی تەکنەلۆجیای زانیاری، تەکنیکی ژمێریاری، تەکنیکی کارەبا، تەکنیکی کارگێڕی کار، تەکنیکی پڕۆژە کشتوکاڵییەکان، تەکنیکی دیزاینی ناوەوە).

٥- پەیمانگای تەکنیکی کفری: (تەکنیکی تاقیگەی پزیشکی، تەکنیکی ژمێریاری).