شارپرێس:
ڕۆژنامەی "حورییەت"ی تورکی لە ڕاپۆرتێکدا ئاشکرای کردووە کە پێشنیاری فرۆشتنی سیستەمی بەرگریی ئاسمانیی ئێس-400ی ڕووسی بە وڵاتێکی سێیەم وەک بژاردەیەکی سەرەکیی بۆ کەمکردنەوەی گرژییەکانی نێوان ئەنکەرە و واشنتۆن هاتۆتە ئاراوە.

 
بەپێی زانیارییەکانی ڕۆژنامەکە، پەیوەندیی لە نێوان تورکیا، ئەمریکا و ڕووسیا هەیە بۆ تاوتێکردنی ئەم ئەگەرە، و پێشبینی دەکرێت یەکێک لە وڵاتانی کەنداو، وەک ئیمارات یان قەتەر، ئەو وڵاتە سێیەمە بێت کە سیستەمەکەی پێ دەفرۆشرێت.

ئەم هەنگاوە لە چوارچێوەی هەوڵەکانە بۆ چارەسەرکردنی دۆسیەی ئێس-400 کە بووە هۆی سەپاندنی سزاکانی کاتسا (CAATSA) بەسەر تورکیادا و دوورخستنەوەی لە پڕۆژەی فڕۆکەی ئێف-35.

لە لایەکی دیکەوە، گۆڤاری "میلیتاری ووتش" ئاماژەی بەوە کردووە کە پێشنیاری رادەستکردنی سیستەمەکە بە وڵاتێکی سێیەم یان کۆگاکردنی بە هاوبەشیی لەگەڵ ئەمریکادا هەیە، بەڵام مۆسکۆ هۆشداریی داوە کە ئەمە ڕەنگە گرێبەستی بەکارهێنەری کۆتایی پێشێل بکات کە پێویستی بە ڕەزامەندیی ڕووسیایە.

ئەم بابەتە هاوکاتە لەگەڵ کۆبوونەوەی سەرۆکی تورکیا ڕەجەب تەیب ئەردۆغان و سەرۆکی ئەمریکا دۆناڵد ترەمپ لە لوتکەی ناتۆ لە ڕۆژانی 7 و 8ی تەممووزدا، کە تێیدا ئەردۆغان هیوای خواست تورکیا بگەڕێتەوە بۆ بەرنامەی ئێف-35.
تورکیا لە ساڵی 2017دا بە بڕی 2.5 ملیار دۆلار ئەم سیستەمەی لە ڕووسیا کڕی، و تا ئێستا هیچ لێدوانێکی فەرمیی لەلایەن ئەنکەرە یان مۆسکۆوە لەسەر ئەم فرۆشتنە نەدراوە.