شارپرێس ـ ڕاپۆرتی شیکاریی تایبەت:

کێبڕکێ گەورەکانی ڕۆژهەڵاتی ناوەڕاست، چیتر بەژمارەی ئەو موشەکانە ناپێورێن کە دەتەقێنرێن، بەڵکو بەتوانای هێزەکان دەپێورێت لەسەر سەپاندنی یاسای نوێی یارییەکە، دزەکردنی زانیارییەکان لەسەر پلانی نهێنیی ئیسرائیل بۆ بەکارهێنانی کارتی کوردی دژ بەئێران، هاوشان لەگەڵ بازدانی سەربازیی تورکیا، ئاماژەی ڕونن بۆ گۆڕانی بنەڕەتیی شێوازی ململانێکان؛ گواستنەوە لەشەڕی ڕاستەوخۆوە بۆ داڕوخاندنی نەیارەکان لەڕێگەی دروستکردنی فشاری ناوخۆیی‌و هاوپەیمانییەتی نوێوە.

پلانی پشیلەی پێڵاودار؛ گۆڕینی ستراتیژیی ئیسرائیل بەرامبەر ئێران
دزەکردنی زانیارییەکان لەسەر پلانێکی ئەمنیی نهێنیی ئیسرائیل بەناوی کۆدی (پشیلەی پێڵاودار) کە لەلایەن کەناڵی 13ی ئیسرائیلییەوە بڵاوکرایەوە، ئاماژەیەکی ڕونە بۆ گۆڕانی شێوازی بیرکردنەوەی تەلئەبیب؛ گواستنەوە لەسیاسەتی "ڕاگرتن‌و بەرپەرچدانەوە" بۆ قۆناغی "دروستکردنی فشاری ناوخۆیی" لەسەر نەیارەکانی.

به‌گوێره‌ى ڕاپۆرتەکان، ستراتیژیی ئەم پلانە لەسەر سێ بنەمای سەرەکی داڕژابوو، یه‌كه‌میان گورزی سەربازیی سنوردار، ئاراستەکردنی هێرش بۆ سەر بنکەو پێگەکانی سوپای پاسدارانی ئێران لەناوچە سنورییەکانی هاوسنور لەگەڵ عێراق، دوه‌میش، جوڵاندنی هێزە کوردییەکان، ڕەخساندنی کەش‌و دەرفەت بۆ گروپە کوردییەکان تا لەو بۆشاییە ئەمنییە سودمەندبن‌و بچنە ناو قوڵایی خاکی ئێرانەوە، سێیه‌میش، گواستنەوەی ئاڵۆزییەکان بۆ ناو شارەکان، واته‌ گۆڕینی ئەم جوڵە سنورییانە بۆ ناڕەزایەتی‌و ڕاپەڕینێکی بەرفراوان کە شارە گەورەکانی ئێران بگرێتەوە، بەمەبەستی لێدان لەسەقامگیریی ناوخۆیی دەوڵەتەکە.

میدیاکان ئاماژە بەوەدەکەن، ئەم پڕۆژەیە بەهۆی ئاڵۆزیی دۆسیەی کوردی لەناوچەکەو فشاری توندی دەوڵەتانی دەوروبەر (بەتایبەت تورکیا)، لەگەڵ دودڵی هێزە کوردییەکان خۆیان، لەقۆناغی تیۆریدا ماوەتەوەو نەچوەتە بواری جێبەجێکردنەوە.

هەڵکشانی سەربازیی تورکیاو تەماحە هەرێمییەکانی ئەنكەرە
له‌لایەکی دیكه‌ى هاوکێشەکە، تورکیا بەخێرایی کار لەسەر بەهێزکردنی توانای زاتیی خۆی دەکات‌و هێزی سەربازیی وەک ئامرازێکی سەرەکی بۆ نفوزی سیاسیی بەکاردەهێنێت، پیشەسازیی بەرگریی تورکیا لەمساڵانەی دواییدا بازدانێکی گەورەی بەخۆیەوە بینیوە؛ لەدابینکردنی پێداویستی ناوخۆییەوە گۆڕاوە بۆ ڕکابەریکردنی بازاڕە جیهانییەکان لەبوارەکانی (درۆنی جەنگی، کەشتیی گەورەی سەربازیی‌و زرێپۆشدا).

ئەم گەشە سەربازییە تەنها ڕەهەندێکی ئابوریی نییە، بەڵکو بەشێکە لەستراتیژییەتێکی فراوانتری ئەنكەرە بۆ چەسپاندنی پێگەی خۆی وەک هێزێکی هەرێمیی باڵادەست کە بتوانێت کاریگەری ڕاستەوخۆی هەبێت لەسەر دۆسیە گەرمەکانی ناوچەکە؛ لەدەریای ڕەش‌و ڕۆژهەڵاتی دەریای ناوەڕاستەوە تا دەگاتە ڕۆژهەڵاتی ناوەڕاست‌و قەوقاز.

سوریا؛ گۆڕەپانی یەکلاکەرەوەی پڕۆژە دژبەیەکەکان
ڕاپۆرتە شیکارییەکان جه‌ختده‌كه‌نه‌وه‌، دۆخی سوریا چیتر قەیرانێکی ناوخۆیی نییە، بەڵکو بوەتە خاڵی بەریەککەوتنی پڕۆژە هەرێمی‌و نێودەوڵەتییەکان، لەئێستادا گۆڕەپانی سوریا شوێنی تێکەڵبونی حساباتی پێنج هێزی سەرەکیە: (ئەمریکا، تورکیا، ڕوسیا، ئێران‌و ئیسرائیل)، هەر گۆڕانکارییەک لەم هاوسەنگییەدا، کاریگەری ڕاستەوخۆی بەسەر عێراق، لوبنان‌و تەواوی ناوچەکەدا دەبێت.

ئەنجامگیریی‌و دیدی داهاتوو
ململانێکانی ڕۆژهەڵاتی ناوەڕاست چونەتە قۆناغێکی نوێوە کە تێیدا هێزی سەربازیی بەتەنها هۆکاری یەکلاکەرەوە نییە، دەوڵەتەکان ئێستا تێکەڵەیەک لەچەندین ئامراز بەکاردەهێنن، ئه‌وانیش، (هەواڵگریی، ئابوریی، هاوپەیمانییەتی، تەکنەلۆژیای سەربازیی‌و بەکارهێنانی هێزە ناوخۆییەکان) بۆ بەدەستهێنانی ئامانجەکانیان بەکەمترین تێچوو.

قۆناغی داهاتوو مەرج نییە شایەتی شەڕی گشتگیرو ڕاستەوخۆ بێت، بەڵکو پڕ دەبێت لەشەڕی سارد، ململانێی هەژمون‌و دەسەڵات‌و دوبارە جێگیربونەوەی هێزەکان، لەکۆتاییدا، ئەو لایەنەی بتوانێت زۆرترین نەرمی سیاسیی، هێزی سەربازیی‌و توانای دروستکردنی هاوپەیمانییەتی پێکەوە گرێبدات، سەرکەوتوو دەبێت لەکێشانی نەخشەی نوێی ناوچەکە لەساڵانی داهاتودا.

پلانی پشیلەی پێڵاودار چییه‌؟
دەستەواژەی (پلانی پشیلەی پێڵاودار ـ The Cat in Boots) ناوێکی کۆدی‌و جوڵه‌ییه‌ کە دەزگای هەواڵگریی ئیسرائیل (مۆساد) بۆ پلانێکی ئەمنیی سەرکێش‌و نهێنیی خۆی داناوە بەمەبەستی گۆڕینی ڕژێمی حوکمڕانی لەئێراندا.

ئەم ناوە لەچیڕۆکە ئەفسانەییە جیهانییەکەی (پشیلەی پێڵاودار)ەوە وەرگیراوە، کە تێیدا پشیلەیەکی زیرەک‌و فێڵباز بەبەکارهێنانی فێڵ‌و زیرەکیی، پاشایەک فریو دەدات‌و خاوەنەکەی (کە گەنجێکی هەژارە) دەکاتە میرو دەسەڵاتدار؛ مۆسادیش بەهەمان عەقڵییەت ناوی ئەم پلانەی ناوە تا لەڕێگەی فێڵ‌و نەخشەی ئەمنییەوە، دەسەڵاتی تاران سەرەوژور بکات.