شارپرێس:
سەرۆكی توركیا دەڵێت "ئامانجمان لەناوبردنی كۆسپی تیرۆرە بۆ ئەوەی توركیا ئامادە بكەین بۆ داهاتوویەكی ئاشتی و ئارام كە برایەتی، یەكگرتوویی و یەكپارچەیی تێدا بەهێز كرابێت".
ڕەجەب تەیب ئەردۆغان سەرۆكی توركیا لە كۆبوونەوەیەكی ئاكپارتیدا لەبارەی پڕۆسەی ئاشتییەوە ڕایگەیاند، "لە ڕۆژی یەكەمەوە چەندین جار هەڵوێستی بونیادنەرانە و نزیكی خۆمان لەگەڵ مەهەپەی هاوپەیمانمان لە هاوپەیمانی جمهوور نیشان داوە. هیوادارین بە پێشكەشكردنی ئەو ڕەشنووسە یاساییەی كە ئامادەمان كردووە و ڕادەستی پەرلەمان دەكرێت، ئەو ڕەوتە خێرایی پێ ببەخشرێت".
دەشڵێت "باش دەزانین خەڵكێك دەیانەوێ قۆناغەكە بەلاڕێدا ببەن. ئەو دەرفەتەیان پێ نادەین كە بیانەوێ تۆمەت ببەخشن و ڕێگریی لە هەوڵەكانمان بكەن".
ئەردۆغان ڕاشیگەیاند، "ئامانجمان لەناوبردنی كۆسپی تیرۆرە بۆ ئەوەی توركیا ئامادە بكەین بۆ داهاتوویەكی ئاشتی و ئارام كە برایەتی، یەكگرتوویی و یەكپارچەیی تێدا بەهێز كرابێت".