كه‌نداڵ جودی ـ شارپرێس:

بەرپرسێکی باڵای ڕۆژئاوای کوردستان ئاشکرایده‌كات، ئەوان دژی بڕیارەکەی وەزارەتی پەروەردەن سەبارەت بەزمانی کوردی، کە تەنها چەند کاتژمێرێکی کەم لەهەفتەیەکدا بۆ خوێندنی زمانی کوردی تەرخانکراوە، ده‌ڵێت، "ئەوەی ڕێگرە لەوەی زمانی کوردی لەسوریا ببێتە زمانێکی فەرمی، دەوڵەتی تورکیایە، هەربۆیە داوا لەدەوڵەتی تورکیا دەکەین، پێویستە پشتگیریی لەفەرمیکردنی زمانی کوردی لەسوریادا بکات".

غەریب حه‌سۆ هاوسەرۆکی پارتى یه‌كێتیى دیموكراتى (پەیەدە) سەبارەت بەبڕیارەکەی وەزارەتی پەروەردەی حکومەتی دیمه‌شق سه‌باره‌ت به‌خوێندنی زمانی کوردی کە تەنها سێ کاتژمێر لەهەفتەیەکدا تەرخانکراوە، بۆ شاپرێس قسه‌یكردو وتى، "دوای ڕوخانی ڕژێمی بەعس، بۆ ئەوەی سوریا ببێتە خاوەن کولتور، ڕۆڵ‌و مێژویەکی نوێ، پێویستە سوریای نوێ گەلی سوریا قبوڵبکات".

حه‌سۆ ئاماژەی بەوەکرد، حکومەتی سوریا زمانی کوردیی قبوڵکردوە، بەڵام تائێستا به‌فەرمی نەکردوە (واتە نەیخستوەتە ناو دەستورەوە)، ئه‌وه‌شى ڕونكرده‌وه‌، "حکومەتی سوریا ڕێگەیداوە هەفتانە چەند کاتژمێرێک وانە بەکوردی بخوێندرێت، بەڵام ئەم وانانەش فەرمی نین، بەڵکو بەهەڵبژاردنەو ئارەزومەندانەیە؛ دەتەوێت دەیخوێنیت نه‌ته‌وێ نایخوێنیت، ئەم بڕیارەی حکومەتی شام-یش قبوڵنەکراوەو تەنها چەند کاتژمێرێک وانەی زمانی کوردی لەهەفتەیەکدا بەس نییە".

لەوەڵامی پرسیاری پەیامنێرماندا سەبارەت بەوەی کە وەک پارتێکی سیاسیی لەڕۆژئاوای کوردستان داواکارییان بۆ زمانی کوردی چییە؟ غەریب حه‌سۆ وتی، "داواکاریی ئێمە ئەوەیە زمانی کوردی لەپاڵ زمانی عەرەبیدا ببێتە زمانێکی فەرمی‌و هیچ کێشەیەکیشمان نییە ئەگەر پێکهاتەکانی دیكه‌ش فێری زمانی کوردی ببن، چونکە ئێمە داوای سوریایەکی نوێ دەکەین، نەک سوریایەکی لاواز".

حه‌سۆ وتی، "هۆکاری قبوڵنەکردنی ئەم بڕیارە ئەوەیە کە لەداهاتودا مەترسی بۆسەر زمانی کوردی دروستدەکات‌و ناچاریان دەکات تەنها بەزمانی عەرەبی بخوێنن‌و بنوسن، بەمەش زمانی کوردی بەرەو لەناوچون دەچێت، ئامانجی حکومەتی شام لەم بڕیارە، پارچەپارچەکردنی زمانی کوردییەو دەیەوێت بەتێپەڕبونی کات ئەو چەند کاتژمێرە کەمەش نەهێڵێت، هەربۆیە پێویستە زمانی کوردی ببێتە زمانێکی فەرمی بۆ نەوەکانی داهاتوی گه‌لى کوردو بکەوێتە خزمەتی گەلی کوردەوە".

غەریب حه‌سۆ ئه‌وه‌شى ڕونكرده‌وه‌، ئەم بڕیارەی وەزارەتی پەروەردە بڕیارێکی سیاسییەو بۆ ئەوەشی لەداهاتودا کێشەو گرفت دروستنەبێت، پێویستە بابەتی خوێندن بەزمانی کوردی بەتەواوی چارەسەربکرێت.

سه‌باره‌ت به‌وه‌ش ئاخۆ چ لایه‌نێك هۆكارى سه‌ره‌كیه‌ له‌به‌رده‌م ناساندنى زمانى كوردى، غه‌ریب حه‌سۆ ئاشكرایكرد، "ئەوەی نایەوێت‌و ڕێگریی دەکات لەوەی زمانی کوردی لەسوریادا ببێتە زمانێکی فەرمی، دەوڵەتی تورکیایە، ئەو ڕێگەنادات زمانی کوردی ببێتە زمانی فەرمی، پێویستە حکومەتی تورکیا پاڵپشتی بکات کە زمانی کوردی لەسوریادا ببێتە زمانێکی فەرمی، چونکە لەداهاتودا دەستورێکی نوێ بۆ وڵاتەکە دادەڕێژرێت‌و هەربۆیەش دەبێت زمانی کوردی ببێتە زمانێکی فەرمی".

هاوسەرۆکی پەیەدە، تیشکیخستەسەر بونی کورد لەسوریاداو ڕایگه‌یاند، کورد لەمێژودا لەسوریا بونی هەبوەو بەشێک لەکوردستانیش لەناوخاکی سوریادایە، هاوکات لەشارەکانی دیكه‌ى سوریاشدا کورد بەسەدان هەزار بونیان هەیە، له‌كۆتاییشدا وتى، "ئێمه‌ پشتگیریی لەهەوڵەکانی تێکەڵکردنەوەی دامەزراوە سەربازیی‌و مەدەنییەکانی ڕۆژئاوای کوردستان لەناو حکومەتی شامدا دەکەین، چونکە داواکاریی ئێمه‌ پاراستنی یەکپارچەیی سوریایەو دەمانەوێت گفتوگۆ لەنێوان هەموو پێکهاتەکانی سوریادا بێتە ئاراوە".