شارپرێس:
بایكۆتی خوێندن لە قوتابخانەكانی چەندین شوێنی ناوچەكانی ڕۆژئاوای كوردستان بەردەوامە و قەندیلیش هۆشداری توند دەداتە دیمەشق.
بەگوێرەی زانیارییەكان لە قوتابخانەكانی ڕۆژئاوای كوردستان كە بە بڕیاری حكومەت خوێندنی كوردی تێیاندا سنورداركراوە بایكۆتی خوێندن بەردەوامە و قوتابیان و مامۆستایان سورن لەسەر خوێندن بەزمانی كوردی نەك دیاریكردنی بۆ چەند وانەیەك هەفتانە.
هاوكات لەكاردانەوەی فشارەكانی سەر خوێندن بەزمانی كوردی و ڕووداوەكانی چەند ڕۆژی ڕابردوو كەجەكە لە ڕاگەیەندراوێكدا دەڵێت "گەل و گەنجانی ئێمە چەندین ڕۆژە لەسەر پێ وەستاون لە دژی ئەمە. نیشانیاندا كە خاوەندارێتی لە پەروەردەی زمانی دایك دەكەن. ئەم هێزە ڕێكخراوەییەی گەلی كورد وادەكات كە پەروەردەی زمانی دایك بەردەوام بێت. گەل و قوتابییان دەڵێن: پەروەردەی زمانی دایك هێڵی سووری ئێمەیە".
لە ڕاگەیەندراوەكەی كەجەكەدا هاتووە "ئینتێگراسیۆنی دیموكراتیك بەر لە هەر شتێك بە قبووڵكردنی دیموكراسی خۆجێیی و بە قبووڵكردنی ئیرادەی خۆجێیی دەبێت. ڕووداوەكانی ئەم دواییەی كۆبانێ نیشانیاندا كە حكومەتی كاتیی دیمەشق ئیرادەی خۆجێیی ڕەت دەكاتەوە. بۆ كێشەگەلێك كە لە بواری ناوخۆییدا چارەسەر دەكرێن، ناردنی هێز لە دیمەشق و حەلەبەوە بە واتای بەردەوامبوونی كولتووری بەڕێوەبردنی دەسەڵاتی بەعس دێت".
ڕونیشیكردەوە "ئەم نیشانەیەی حكومەتی دیمەشقی كاتی نەك تەنها لە ڕۆژئاوا و سوریا، بەڵكو لە هەر چوار پارچەی كوردستان و سەرانسەری جیهاندا بووە هۆی ناڕەزایەتی كوردان. دەم پارتی دەستێوەردانی لە كۆبانێ وەك ئاژاوەگێڕییەك لە دژی پرۆسەی ئینتێگراسیۆنی دیموكراتیك لێكدایەوە. كەمبوونی ڕێژەی دانیشتووانی كورد لە ڕۆژئاوا و سوریا بە بەراورد بە پارچەكانی تری كوردستان بەو واتایە نییە كە بێخاوەنن و ئەم هێرشە قبووڵ دەكەن".
هەروەها كەجەكە لە ڕاگەیەندراوەكەدا ئاماژەی بەوەكردووە "كوردەكانی ڕۆژئاوا و سوریا ئەو كوردانەن كە شۆڕشی دیموكراتیكیان ئەنجامدا. ئەم شۆڕشە هۆشیاری, ئیرادە و ڕێكخراوەیی پێداون. گەلی ئێمە دەتوانێت ئەم هێزەی خۆی بە چالاكی دیموكراتیك نیشان بدات و هەموو جۆرە هێرشێك تێكبشكێنێت. دیموكراتیكبوون و مافە دیموكراتیكییە بنەڕەتییەكان بە چاوەڕوانی پارێزگاری لێ ناكرێت و بەدەست نایەت! لەبەر ئەوە، گەلی ئێمە دەتوانێت مافە دیموكراتیكییەكانی خۆی لە ناو ڕەواییدا بەكار بهێنێت. هەڵوێستی گەل و قوتابییان بۆ پەروەردەی زمانی دایك نموونەیەكی گرنگی بەكارهێنانی مافە دیموكراتیكییەكانە. بۆ ئەوەی تێكۆشانی دیموكراتیك بەهێز و بەردەوام بمێنێتەوە، زۆر گرنگە كە ڕێكخستنی كۆمەڵگەی دیموكراتیك بەرفراوان و قووڵتر بكرێتەوە. حكومەتی كاتیی دیمەشق دەبێت خۆی لەو هەڵوێست، نیشانە و دەستێوەردانانە بەدوور بگرێت كە زیانی پێدەگەیەنێت. دەبێت هێزی كوردان بۆ دیموكراتیكبوون و ئارامی سوریا بەكار بهێنێت. دەوڵەتی سوریا كاتێك كە ژیانی دیموكراتیك و ئازادی هەموو ناسنامە و باوەڕەكان بناسێت، ئەو كاتە دەتوانێت ئارام و بەهێز بێت."
