شارپرێس:
وتەبێژی پارتی دیموکراتی کوردستان رایدەگەیەنێت، ئامادەن بۆ گفتوگۆ و کۆبونەوە لەگەڵ یەکێتیی نیشتمانیی کوردستان بەمەبەستی چارەسەری کێشەکان و کۆتایی ھێنان بەقەیرانی سیاسیی ھەرێمی کوردستان.

مەحمود محەمەد، وتەبێژی پارتی دیموکراتی کوردستان لەڕاگەیەنراوێکدا ئاماژەی بەوەکرد،" ئاماژە بە پەیامە دەست پێشخەریەکەی ئەمڕۆی جەنابی سەرۆک مەسعود بارزانی سەبارەت بە بارودۆخی سیاسی و بە ئامانجی تێپەڕاندنی بنبەستە سیاسییەکان، پێشوازی لەم پەیامە دەست پێشخەرییە گرنگەی جەنابیان دەکەین ".

ئەوەشیخستەڕوو،" ئێمە لە پارتی دیموکراتی کوردستان، لە ڕۆشنایی دەست پێشخەریەکەی جەنابی سەرۆک ئامادەین بۆ گفتوگۆ و کۆبوونەوە لەگەڵ برایانی یەکێتیی نیشتمانیی کوردستان بەمەبەستی چارەسەری کێشەکان و کۆتایی ھێنان بەقەیرانی سیاسیی ھەرێمی کوردستان ".

وتەبێژی پارتی دەشڵێت،" ئامادەین سازدانی گفتوگۆ و کۆبونەوە لەگەڵ لایەنە سیاسییەکانی دیکەی ھەرێمی کوردستان بۆ ئەوەی پێکەوە وەڵامدەرەوەی ویست و ئیڕادەی ھاونیشتمانیانمان بین و ئەم قۆناغە بە سودی گەل و نیشتمانەکەمان تێپەڕێنین ".